泳兒 推出全新派台作品《存活》，佢仲指新歌係教大家喺紛亂世界中真正「活着」。Vincy指新歌講述嘅唔止係呼吸生存，而係對生命嘅熱誠同追求。Vincy話：「存在基本上係維持生命指數，三餐溫飽就夠；但『活着』係對生活有盼望，甚至係有使命感。」
原來新歌靈感係源自Vincy年初到芬蘭旅行嘅經歷，佢話本來旅程並冇追極光嘅計劃，因為之前於冰島已感受過，不過後來覺得既然已身處芬蘭，點解唔積極再追多次極光呢？雖然最後因天氣惡劣而與極光無緣，但過程就令佢感悟：「對於生活、生命其實唔可以計較最終個結果，過程中你嘅盼望、追求，先係最珍貴。」
Vincy不經不覺入行二十年，佢坦言期間容易迷失，甚至失去當初熱誠，不過佢對自己仍然着緊每件事，甚至有點「執着」而驕傲：「好老土咁講，如果人冇夢想，同條鹹魚有咩分別？」
至於歌曲主題「存活」，多年來唔少網民歌迷都認為佢值得更多，對於呢份情感，Vincy亦有感觸，默默耕耘付出未必有回報，就係「存活」嘅現實，不過佢認為「過程中有認真對待、有投入過，嗰種熱血就已經係活着嘅證明。」更自嘲自己有種「要繼續努力」嘅執着，唔止係對自己嘅勉勵，就算結果不似預期已對得住自己。
雖然抱持正面態度，不過MV拍攝就「計劃趕不上變化」，原本打算挑戰行900級樓梯欣賞秘景，不過因為7月幾乎每日大雨，最後改成Plan B，場景包括Vincy屋企、南生圍同車廂，更有同愛犬Batman互動。