陳妍希與陳曉去年2月宣布離婚，結束近9年嘅婚姻關係，二人共同陪伴兒子「小星星」成長，妍希日常主力照顧「小星星」。近期正值暑假，43歲陳妍希寓工作於娛樂，帶9歲阿仔「小星星」同行，母子前往曼谷度假。
妍希早前因運動導致跟腱斷裂休養並一度打石膏，傷癒復出後狀態極佳，見佢身穿低胸高衩禮服，以絕佳狀態出席當地公開活動後，妍希連日喺社交平台分享多張母子同遊泰國嘅合照。
相中見9歲阿仔「小星星」遺傳父母高顏值，眉眼神態非常有型，身高已直逼媽媽膊頭。二人此行去咗當地有名嘅鐵路市集外，仲去咗當地一間動物主題咖啡廳，見妍希與阿仔「小星星」由現場工作人員陪同引導下，近距離撫摸小獅子並合影，留下甜蜜親子旅遊嘅點滴。
