9月12號係 哥哥 張國榮 70歲冥壽，哥哥生前經理人 陳淑芬 舉行嘅紀念展呢日開幕禮，唔少哥哥生前好友都有出席，好似 陳松伶 同老公 張鐸 顏米羔 奚仲文 連炎輝 同 張叔平 等一齊現身。
陳太指最近除咗忙展覽，亦正投入籌備同樣下月舉行嘅紀念演唱會，佢仲指當日將有無人機光影演出，亦會有唔少歌手擔任嘉賓，呢日參與嘅松松同米羔亦都係嘉賓之一。松松就指遺憾當年未有機會同哥哥合作，不過就不時欣賞哥哥演出喇。至於米羔就指非常榮幸可以參與其中，有份演出心情非常緊張呀。
而 張與辰 呢日臨時缺席，未知係咪因為早前佢設計嘅「蒼蠅風波」所致，不過陳太受訪時，就認為與辰嘅設計並無矮化嘅意思，因為佢視自創嘅IP如親生仔，估計係外界誤會。佢又話與辰非常喜愛哥哥，唔相信對方會以自己嘅IP貶低哥哥。
