50歲「師兄」劉浩龍早前完成個人演唱會，為歌迷送上多首耳熟能詳嘅經典作品，讓一眾樂迷大飽耳福，師兄於台上公布加盟新唱片公司，並將新歌《綻放》贈予樂迷。8月13日適逢師兄生日，新歌正式於各大音樂平台上架，成為佢加盟新公司後第一首推出嘅作品。
師兄喺演唱會時曾向在場Fans講過呢首歌曲係與樂迷有密切關係：「我希望嚟緊呢首新歌將會成為以後我哋開 Show 都會唱嘅大合唱歌，係代表我同你哋嘅一首歌。」歌詞圍繞愛情主題嘅感覺，師兄綵排望向觀眾席時，便將歌中「伴侶」嘅情感投射於一路以嚟對自己不捨不棄嘅Fans身上，一直陪師兄行落去。
師兄與監製周錫漢（Randy）今次首次合作，源起因去年一個電視節目中，師兄作為導師時與一眾擔任評判嘅音樂監製碰面，驚覺於一眾監製當中，僅未曾與Randy合作，籌備創作前，師兄分享呢幾年間嘅心路歷程：「我同 Randy 講我終於唔怕唱歌啦！因為我有段時間對唱歌有包袱、逃避，但經歷咗舊年我終於鍾意返唱歌。所以就想做一隻關於我唔驚嘅歌出嚟！」
Randy好快就搵到《綻放》Demo，師兄聽後對旋律及Demo歌詞亦十分滿意：「我哋兩個都好鍾意呢隻歌！本身都有諗過再填一份詞，但試唱後發現呢個旋律好適合而家比較易理解嘅詞，所以最尾用咗幾日同幾位創作人一齊慢慢修改，就有而家出街嘅版本。」
雖然旋律與歌詞冇太大改動，但師兄覺得歌名係必須改動：「我想講幾好笑，本身隻歌其實係叫〈綻放男孩〉。但都好難用「男孩」㗎啦，都去到呢個年紀。」師兄加入新公司表示希望自己能夠做一位「活躍歌手」：「我希望自己唔係再幾年一隻歌！之後會繼續創作更多歌曲，目標成為一個多播放率嘅歌手！」師兄透露未來歌曲風格方面，承諾將創作更多「劉浩龍式」情歌：「樂迷係一定可以等到啲你哋鍾意聽嘅、以前劉浩龍風格嘅情歌！嚟緊我哋將會慢慢咁送畀大家！」