奧斯影后楊紫瓊於2023年秘嫁拍拖19年嘅法國富豪尚陶德（Jean Todt），與繼子Nicolas Todt一向關係友好，繼孫Maxime於2024年出生後，楊紫瓊錫到呢粒孫不得了，不時喺社交平台分享湊孫日常，噚日大曬Maxime一齊奔跑嘅相，可見楊紫瓊對呢位繼孫疼愛有加。
楊紫瓊曾於2024年開心曬出初生嬰兒嘅腳仔相，網民一度誤會其秘密產子，隨後楊紫瓊澄清自己係晉升「最幸福和最驕傲的祖父母」，呢次楊紫瓊與Maxime出席家庭成員活動，坐私人飛機出發，二人仲開心奔跑，楊紫瓊仲抱住乖孫，短暫參觀駕駛艙，楊紫瓊喺晚上身穿黑白連身裙，跟家人一齊舉杯暢飲，好好享受家庭聚會。
楊紫瓊曾受訪自言好喜歡小朋友，與尚陶德拍拖時，男方曾多次求婚，楊紫瓊未有答應，佢卻想先做媽媽，因此接受多次人工受孕，最後都未能成功，目前佢唔使開工嘅日子，就好享受弄孫為樂嘅生活。
