胡杏兒對馬爾代夫情有獨鍾，差唔多每年暑假都會舉家前往當地度假，今年亦唔例外，杏兒呢次喺哈達盧環礁租咗奢華海景私人別墅，附設私人泳池及長滑梯，供一家五口享受親子樂！
杏兒曾公開讚馬爾代夫奢華度假村既隱私又舒適，非常適合一家人旅行，噚日佢喺社交平台上載多張合照，相中見杏兒三個寶貝仔開心依偎喺父母身邊，杏兒溫柔地喺水上網床環抱住細仔李奕宏（Liam）等，無論係坐喺戶外鞦韆椅上享受海風，定係瞓喺甲板曬太陽，全家人洋溢著燦爛嘅笑容。
杏兒亦不忘跟老公李乘德（Philip）曬恩愛，見杏兒深情攬住老公頸部，身體緊密貼合，以極具愛意嘅眼神近距離甜蜜對望，自然流露出夫妻深厚嘅默契，可見二人非常恩愛。
Philip與三個寶貝仔穿上天藍色底、印有橙黃色花嘅短袖衫，下身搭配休閒短褲，夏日活力十足，杏兒則身穿寶藍色優雅連身寬褲，露玉背大曬線條感，喺視覺上與家人衣着完美契合。
