《2026香港小姐競選》倒數半個月，12位佳麗嘅狀態越來越弗，大會安排佳麗們齊齊以純白裙裝出席腕錶活動，展現優雅氣質。最後由9號周芳姿、10號陳梓穎、11號顏懿菲、12號湯家琳得到大會頒發最佳演繹大獎。10號陳梓穎話能夠勝出，歸功於12號湯家琳，因為四人甫士編排都係對方主意。
12位佳麗喺活動上要輪流行catwalk，仲要講一段長獨白，正好為港姐決賽熱身，經過兩個月嘅訓練，佳麗喺各方面進步唔少，面對鏡頭亦更加有自信。
1號袁絲珩直認喺台上信心大咗，能夠同觀眾多咗有眼神接觸。2號李澤欣由唔識着高踭鞋，到依家可以擺靚甫士，佢笑言覺得自己好厲害。講到賽前準備，佢就話擔心才藝表現，因為時間緊迫，練習時間唔係太多。
另外，擔任司儀嘅鍾雨璇，早前被人拍到捉騙子嘅英勇片段，話因為朋友喺網上購物遇上騙徒，之後就挺身而出幫手捉騙子，事後回想原來都有一定危險，因為唔知對方身上有冇武器。
