伍富橋同太太Shirley好快就迎嚟仔仔出世，喺呢段懷孕期間，Alvin悉心照顧太太，同時亦為仔仔準備咗首新歌《約定一起看未來》。Alvin日前同小演員一齊為新歌拍攝MV，Alvin喺鏡頭前教小演員打pickleball，太太Shirley特別嚟探班支持，Alvin話首歌係充滿佢哋對仔仔嘅期望同承諾。
踏入懷孕尾段時間，兩夫妻表示對生小朋友冇壓力，心情都冇緊張，反而係期待阿仔嘅來臨，而Shirley話自己胃口正常，冇特別暴飲暴食。Alvin就話自己盡量抽時間陪太太，令太太開心。Shirley話仔仔夜晚特別好動，Alvin就會趁嗰啲時間，隔住肚皮同仔仔傾偈互動。
Alvin為咗今次新歌MV，特別設計咗卡通公仔，佢話幻想仔仔係大眼睛同頭髮捲毛。講到仔仔名字，佢哋話中文名等仔仔出世後先按時辰八字去改，而英文名就由Shirley改做Julian，Shirley話讀書時有位唔認識嘅男同學，金髮捲毛兼藍眼睛非常靚仔。
