《中年好聲音2》唱將梁浩賢聯同一眾粉絲聚會，齊齊慶祝歌迷會成立兩周年。開心日子，一班中聲家族嘅古淖文、顏米羔、陳燕娜、丁文俊等現身到賀，浩賢亦準備現場樂隊伴奏，將聚會變成Mini Concert。
現場氣氛高漲，浩賢當然叫埋中聲戰友合唱，聽得大家如癡如醉。浩賢話成班中聲老友經歷好多，又不斷有合作，所以感情深厚，每逢有活動均互相支持。
浩賢同甘永傑、劉威煌老友鬼鬼，佢哋三個仲搞咗一個網上節目唱舊歌、講舊事，早前佢哋就邀請咗陳慧琳細佬陳司翰任嘉賓。另外，佢又透露三人有意出合唱歌，為將來嘅線下活動作準備。
