林盛斌（Bob）與太太Pearl育有三女一子，一家六口幸福美滿，18歲大女林霏兒（Faye）係應屆DSE考生，網民都好關心Faye升學去向，Faye今日喺社交平台曬出演藝學院學生證，疑隨爸爸阿Bob走上充滿挑戰嘅演藝之路！
Faye可謂女大十八變，近年打扮大膽，展現出自信與青春活力，懶理網民對其衣著與身材嘅負評，獲得唔少網民力撐，早前更拍攝成人禮寫真，Faye今日喺社交平台與網民chit chat，問到父母會唔會叫佢唔好衣著太性感。
Faye坦言爸爸比較多意見，而有時某啲場合會建議佢着咩比較好，自己都有跟返場合着，「我自己唔係好理有時冇必要嘅comment咁解，始終係我自己買嘅衫、我自己嘅身體，我有呢個權利呢個自由，我開心就好了」。
另有網民問及佢升學去向時，Faye手持住演藝學院學生證，之不過佢用手指遮住學生編號同課程名稱。話晒爸爸阿Bob向來作風開通，給予仔女好大自由度與正能量，相信佢會畀阿女Faye自己決定選修科目，未知Faye係承接父親演藝衣缽，定係朝向幕後發展呢？
