台灣資深歌手 尤雅 出席高雄個唱記者會，作為嘉賓嘅 馮偉傑 都有現身獻花。雖然尤雅已經年屆72歲，不過體態同外貌都Keep得好好，而長年旅居美國嘅佢對上一次喺台灣開唱已經係15年前嘅事，所以呢次佢都好期待同寶島嘅歌迷再見面，仲話會加強歌單，揀歌迷比較想聽嘅歌。
不過講到有冇加場可能？尤雅就話高雄站絕不加場，但反而有可能會開台北場，不過都希望台北嘅朋友都可以嚟高雄站睇咗先。
尤雅對個人生活非常低調，所以大家都對佢嘅感情生活備受關注。呢次佢亦難得談感情狀況，直認自己蜜運中！不過尤雅就話目前雙方冇結婚，只係拍拖關係，仲話男友到時候會嚟睇Show。但其他嘢佢就唔答，仲話驚大家嚇到男友逃走。
台語歌后陳盈潔日前病逝，曾經同佢屬同門嘅馮偉傑都特別傷心，喊足一晚。馮偉傑形容陳盈潔性格好似「大家姐」，當年亦教佢唔少嘢，仲帶佢飲飲食食。不過二人已經兩年幾冇見，當知道陳盈潔死訊時，真係好傷感。