60歲嘅「舞台王者」 郭富城 向來事業心重，但自成家後，照顧妻女嘅暖男同顧家好爸爸形象亦已深入民心。近日城城暫停備戰巡迴演唱會，亦趁繁忙行程中陪伴三個囡囡放暑假，一家五口到新加坡遊玩。
城城上月中於杭州開唱前，就被直擊於當地機場親力親為抱住細女，一家五口一齊到當地出騷。而日前呢個暑假全家出行旅程就於新加坡延續，有網民先後於當地主題樂園同野生動物園巧遇城城一家，更盛讚佢毫無天王架子，全程專心陪小朋友親近大自然。
昨日城城又罕有喺社交平台，公開一系列新加坡之旅嘅家庭合照。相中可見佢帶同太太 方媛 同愛女參觀水族館、近距離接觸小動物、身為馬主又係馬會代言人嘅佢又俾囡囡體驗騎馬，大寶同二寶更於泳池暢泳，合照中一家五口笑容洋溢，幸福滿瀉。
城城下月中起，就會重新開始演唱會巡迴演出，相信佢會繼續把握囡囡開學前嘅寶貴時間，陪住三寶度過炎夏。
