謝霆鋒 同 張柏芝 早年誕下兩名兒子Lucas謝振軒同Quintus謝振南，兩人都完美遺傳父母嘅優良基因，兩兄弟去年曾陪嫲嫲狄波拉，現身霆鋒啟德演唱會現場時經已成全場焦點。但日常生活中，兄弟就極為低調，Lucas據指赴澳洲主修音樂，而細佬Quintus就熱愛排球成為一名運動健將。
網上近日有相片流出，身穿5號球衣嘅Quintus，以俗稱「大砲手」嘅主攻手位置出戰排球賽。貴為矚目嘅星二代，Quintus喺球場上同樣耀眼，反應敏捷嘅佢每每看準時機都會積極進攻，與隊友默契十足互相補位。
而廿四孝媽咪 張柏芝 亦被發現現身球場，柏芝全程喺球場高處為Quintus打氣，又為愛兒捕捉靚相，同Quintus一樣非常投入比賽。現年16歲嘅Quintus身高已有大槪180厘米，喺大量運動同繼續發育下，身高超過六呎絕非難事。
