韓國女團CLC將於本月29號喺西九舉行出道11週年巡演唱會，呢次亦係CLC 六位成員：承姬、有真、丞延、Sorn、睿恩、莊錠欣Elkie 及 恩彬 久違全員齊集重臨香港，而一眾CHESHIRE（CLC粉絲暱稱）仲有機會同佢哋合照。
今次CLC巡唱香港站為一眾CHESHIRE帶嚟唔少福利，演唱會當日除咗全場觀眾都可以參加 HI-BYE 同隨機讀信環節，仲會獲得香港站官方海報及限定小卡。而VIP觀眾則可以享有全員 HI-TOUCH、觀看綵排及周邊優先購買等福利外，仲有機會獲得全員6V1合影、全員6V10合影、全員6人親筆簽名海報、6人隨機親筆簽名小卡一張、全員面簽海報呢5項限定福利中嘅其中一項。至於GA觀眾則有機會獲得4項限定權益中至少一項，包括全員6V20合影、6人隨機親簽小卡一張、全員6人親筆簽名海報、6人隨機印刷簽名自拍寶麗來小卡一張。
另外，但凡喺29嘅演唱會中選任何型式合影嘅觀眾，將可以參加30日上午第一場合影活動，現場仲安排咗30分鐘 Meet & Greet 及遊戲環節，入場觀眾可獲贈官方手幅及不同於29號款式嘅香港站限定小卡。至於30號下午嘅第二場活動，將以福利禮包形式，提供畀29號演唱會全場門票持有人開放購買。
