顏志恆 魏嘉信 林兆霞 同200位小演員合演嘅音樂舞台劇《我們都in過的第一志願》，星期日完滿結束。Cris仲因為今次同兩子同台演出而感觸落淚，細仔仲遞上紙巾跳高為爸爸抹眼淚，非常感人。
大會仲於現場送上蛋糕，為Cris預祝17號生日，佢更感觸提到生日願望，非常感謝呢次機會，可以同兩個仔仔一齊同台演出，Cris話：「我真係人生中冇諗過，可以同個仔一齊做舞台劇。」
而同樣同仔仔一齊演出嘅Benson亦非常高興，佢話：「我個仔就係呢間學院讀咗幾年，亦都已經有幾年嘅演出經驗。而我同佢就係第二次合作。佢由無咩對白，到而家有好多對白，甚至我同佢有對手戲。呢啲經歷我係會永遠記住，係我哋兩父子之間，好美好嘅共同回憶。」
一眾參演小朋友早於暑假前，已開始每日恆常訓練，到七月暑假開始，更進行密集式訓練，直到一連四場演出。Benson與Cris同佢哋嘅小朋友順利完成整個演出，兩位爸爸都表示一定要感激太太嘅付出同無限支持，而女主角阿June見兩個家庭嘅齊心，都搞笑曬命：「我都要好多謝我老公，佢都係好支持我。見到你兩個到家庭咁溫馨，我都要話俾人知，我老公都好愛我，我都好愛我老公。」
Benson同Cris兩位「中聲」家族成員，今次唱歌、跳舞又演戲，都表示要特別多謝大前輩阿June ，Cris指：「其實自己一直都好想演戲，今次呢個音樂劇，真係滿足咗我好多個願望。最幸運有大前輩傍住，佢教識我好多嘢。」Benson同Cris仲大讚仔仔們表現有120分，比爸爸做得更好。