高鈞賢 近日身陷鄰居糾紛風波，事緣有網民以不開名形式，於網上發文指控住喺佢樓上嘅香港明星家庭「每天沒日沒夜惡意奔跑、走路跺腳」，不料高鈞賢 17 號親自拍片作出回應，除咗講返事件經過，仲強烈譴責針對佢家人嘅網絡暴力行為。
高鈞賢喺片中坦言「沒想到吃瓜吃到自己身上」，佢指家中確實有一個不受控生物 — 就係佢剛滿 18個月嘅囡囡Liona。高鈞賢指因為一家人剛由加拿大回家，仍在調整時差，加上囡囡係學行階段：「各位帶過寶寶得家長應該也懂，要讓一個一歲半、半夜精神百倍的寶寶，原地不說話、不走動靜下來，難度比拯救地球還大。」佢又指如果囡囡嘅學步聲，真係嘈到鄰居，佢代囡囡講聲唔好意思。
喺指控帖文發出前，高鈞賢指其實樓下業主嘅老公都有同佢溝通過，不過佢話當時對方嘅態度相當唔好，高鈞賢話自己已經盡量客氣，佢喺片中仲展示家中嘅防護措施，指客廳鋪咗加厚保護墊，櫈腳亦套上了防噪音腳套。高鈞賢指當時自己非常真誠咁畀咗個意見對方：「如果對聲音真的是敏感到，連一點正常活動、動靜都接受不了，其實深圳有很多房子，真的可以考慮買棟別墅，這樣上下左右，都保證絕對是清靜的。」
片中高鈞賢指最令佢惱怒同無法接受嘅係，原本屬於鄰居間嘅摩擦，對方卻選擇喺社交平台發文並引導網民，導致部分網友對佢妻子嘅容貌、職業進行惡意人身攻擊，甚至波及到只得18個月大嘅女兒。高鈞賢語氣堅定咁話：「你把個人的神經敏感和鄰居糾紛包裝成網絡公審，當作發洩情緒的武器去攻擊我的家人。作為一個老公、一個父親，這是我絕對的底線！我堅決反對，也絕不接受任何類型的網絡暴力。」
雖然高鈞賢喺片中展示出家中各項防噪音措施，不過網民睇完片就唔多賣賬，仲放大高鈞賢放出嘅「證據」，指佢張保護墊只係小小一塊，建議可以鋪滿半個客廳，亦有人指高鈞賢嘅言論係強盜邏輯：「製造噪音還要怪人家噪音敏感讓人家去住別墅？是不是每一個製造噪音的人都是這樣的強盜邏輯啊」，亦有網民將高鈞賢早前喺另一條片中，指囡囡凌晨三點喊時，自己會抱住囡囡喺客廳行嚟行去，截圖放喺留言區，不過截圖上傳後，該影片已被消失。
