羅嘉良、楊茜堯、何廣沛、陳煒、張曦雯及劉佩玥（Moon）等呢日多位《模範律師團》演員正式煞科，茜堯興奮拋公事包，兼攬一攬好拍檔羅嘉良，眾人辛苦咗兩個月終於煞科，總監製鍾澍佳跟一眾演員開香檳慶祝，預祝《模範律師團》收視爆燈。
最後一日拍攝一啲都唔輕鬆，煒哥喺烈日當空下開工，高溫超過36度，煒哥一度中暑不適，茜堯拍劇嗰陣因攰得滯，又聞到啲唔係幾好嘅氣體，要入醫院吊鹽水，幸好無乜大礙，好快就出院。
廣沛同阿Moon喺劇中跟前輩羅嘉良有好多對手戲，可以同呢位大前輩學習，佢哋讚前輩幕前演出好專業，私下份人就好盞鬼，二人都好唔捨得「師父」羅嘉良，阿Moon每次見到師父都係心心眼，話師父會做啲好騎呢嘅表情。
廣沛話前輩們埋位好認真，cut機嗰陣，知道大家都辛苦，羅嘉良同茜堯就會同大家講笑，令氣氛輕鬆啲。
張曦雯覺得有機會同羅嘉良合作係好夢幻嘅經驗，煞科後可以放吓假，問到佢係咪同吳卓羲借貓傳情，張曦雯話「冬菇」係一隻街貓，屬於佢自己，而家一個人養，叫主播 許文軒 等吳卓羲在場先再問，張曦雯仲話嚟緊另一套劇宣傳先問佢囉！
