李佳芯親自導演兼監製，為慈善機構「耆智園」拍攝，關注腦退化症嘅短片《伴》正式喺網上首播，Ali首次身兼演員、導演、監製同編劇四大崗位，仲邀請埋資深導演兼演員 張同祖 飾兩父女。前後籌備長達一年時間嘅短片已經喺Ali最近正式成立嘅個人YouTube頻道播出喇。
雖然Ali演出經驗豐富，不過製作經驗欠奉，所以今次就要四出「拍膊頭」請幕後朋友幫忙喇，仲曾經因為壓力太大幾乎想放棄計劃，佢話：「初初以為慈善Project唔需要好多錢，所有嘢諗得太簡單，到叫人幫手做嘢時，發現要搵到合適嘅人做合適嘅崗位真係唔易，當下真係好徬徨無助，有時係到諗我咁辛苦為乜呢？老實講我一蚊都冇收，既然唔係為賺錢，點解我要攞苦嚟辛呢？」
好在最後搵到電影編劇幫忙寫劇本，加上祖哥 張同祖幕前幕後都不遺餘力幫忙，令Ali總算成功完成呢次拍攝。其實祖哥已經多年未有喺幕前亮相，今次能夠請到祖哥出山飾演父親角色，過程原來非常唔簡單：「我托朋友介紹聯絡佢幫手時，佢真係唔知我係邊個嚟，亦冇睇過我嘅作品。我send資料畀佢後，過咗幾日見冇回音，我就膽粗粗約佢出嚟飲茶以表誠意，第一次見面佢已經比咗好多劇本上嘅寶貴意見，最後見多幾次面後，終於打動到佢幫忙演出。」
Ali大讚祖哥唔止冇計較酬勞，仲喺拍攝時分享自己嘅執導經驗：「佢灌輸我知電影究竟係咩一回事，話比我知對每個作品嘅要求同高度，我喺佢身上睇到佢對電影嘅每一份執著同熱誠，非常敬佩。」
可惜心血作品正式面世之後，Ali本來打算舉行首映禮，奈何因為疫情反覆，最後決定將首映移師到網上發布：「我諗深一層，我搞首映最多都係幾百人入場睇，但呢個Project受眾更多先會令成件事更有意思，所以最後選擇以網上形式搞首播，大家都可以免費睇到，影響力先會更加大！」
《伴》呢到有得睇： https://youtu.be/0XAyEMocBhY