[近照曝光] 與李啟言家人跟舞者見面 SoChing暴瘦令人心痛

喺7月底嘅紅館演唱嚴重意外中受傷嘅舞者阿Mo李啟言，其父李盛林牧師早前表示之前曾經同演唱會嘅一班舞者見面，了解當日嘅意外情況。
喺21號晚，舞者Zisac同Angus分別就喺社交平台貼出，較早前佢哋呢班舞者同阿Mo家人以及其女友蘇芷晴SoChing見面時影嘅相。喺相中所見，阿Mo嘅爸爸同哥哥都將頭髮剷青，並同一眾舞台擁抱寒暄，而久未露面嘅SoChing，以全黑打扮同一眾舞者交談，但就相中所見，SoChing比之前公開露面時相比，明顯瘦咗成個圈。

有冇演出今次演唱會嘅舞者Angus Hui，就喺帖文上表示呢次係事發後，第一次同阿Mo嘅家人同埋SoChing見面，佢話其實阿Mo出事次後，一直好擔心SoChing：「看着她神情低落只感到哽咽難言，知道她原來都在擔心我們令我更痛心。」Angus話唯一可以做到嘅，就係互相以擁抱嚟給對方力量。佢又話記得當日李牧師同家人交代Mo嘅情況，以及整個災難嘅詳細經過嗰陣，佢哋咁多個舞者都覺得悲痛欲絕：「大家情緒都非常激動，除了哭和互相扶持，我們做不了什麼，非常無助。」

而另一位喺演唱會綵排時受傷，而未有一同演出嘅舞者Zisac Law，則喺帖文入面計出阿Mo受傷後望住天花板嘅時間：「55days x 24hrs = 1320hrs」Zisac又話當日見面，李牧師畀佢嘅一個擁抱，對佢嚟講含有極巨大意義，因為呢個擁抱係一位兒子仲喺病房嘅爸爸，畀咗一個強大嘅支持佢，Zisac喺帖文上寫道：「我去見佢之前，我以為自己已經準備好為佢哋一家人提供一份支持，即使係幾渺小嘅力量都好。但當我見到佢哋，我就知道，我未，我身體嘅痛楚會慢慢消失，但係我個心仲係好痛。」Zisac話自己同阿Mo唔算識咗好長嘅時間，合作嘅次數亦唔多，但作為一個團體，親眼見到成員受咁嚴重嘅傷害，作為一個人無可能唔心痛。Zisac又話好多謝李牧師喺自己都經歷緊呢個苦難嘅時候，都可以帶到安慰畀佢。

Zisac又心痛到SoChing喺咁短時間內，要被迫成長成為一個堅強嘅大人，佢話自己同SoChing雖然談唔上係認識，但都好多謝對方對自己嘅鼓勵，Zisac希望SoChing可以好好過生活。至於講到仲喺病床上嘅阿Mo，Zisac就話明白到阿Mo嘅世界而家係充滿住好多「唔可以」，所以令作為健康、可以重回生活嘅佢感到內疚，Zisac又話無論呢件事就算淡到咩地步都好，對相關嘅人嚟講，都係會有一個永不磨滅嘅印記。