監警會委員余黎青萍於9月20號喺會議上忽然扯TVB落水，把選美泳裝環節與虐待兒童、色情及暴力相關議題掛勾，指責TVB選美傳統泳裝環節太少布，遭網民抨擊！
「選美少布論」一觸即發，引起各界關注，Ben Sir歐陽偉豪、馮德倫、肥媽Maria Cordero及黎諾懿等，先後發言挺TVB，批評余黎青萍嘅「針對」指控，覺得佢嘅言論跟議會話題脫軌。電影人馮德倫噚日喺社交網反擊：「虐兒問題嚴重當然要重視，保護兒童是必要。把責任推到香港影視，請拿出證據，有統計嗎？」而Ben Sir喺社交平台發文，撐港姐泳裝環節，「你批評香港小姐泳衣太少布，就好似批評議論文太少詩意；批評白開水太淡，批評阿婆太少頭髮」。
翻查資料顯示余黎青萍喺七十年代曾擔任油麻地民政主任，高調支持無上裝演出「入侵」地區酒吧，當年受訪時仲話對於無上裝酒吧一事，絕不感到半點憂慮，指係對旅客及外國人增添新玩意，所以沒有人防礙，相反佢今時今日嘅言論卻變得思想保守。
而TVB企業傳訊部已發出聲明，指個別人士發言針對TVB，並指名道姓對TVB高級行政人員作出惡意指控，強烈譴責相關言論。
港姐統籌經理何小慧，現身港姐宣傳活動時，何小慧回應此事：「可能係佢個人意見表達，我都不作任何個人意見，最緊要就係我哋公司都好快作出聲明。」問到此事會否影響大家心情，何小慧強調唔會取消泳裝環節，並續道：「之前我哋已經同啲女仔講，畀佢哋知道有呢件事，我哋都話畀佢哋聽我哋公司會作出一個正面聲明，亦係保障佢哋，佢哋係參賽者嚟嘛，我哋當然希望平平安安去到25號，喺紅館做一場好好睇嘅50周年Miss Hong Kong騷畀大家！」
