袁文傑晉級《好聲好戲》決賽 李佳芯呻夾口形最難

TVB聲演真人騷《好聲好戲》第二季最後一張入場券，由袁文傑晒鬼馬跳脫Tone及多國語言聲演「Benz雄」，突圍而出，撼低李佳芯（Ali）、陸浩明（6號）及黃俊豪，成功躋身決賽！

李佳芯今回演「Miss Mo」鄭裕玲奄尖腥悶神韻有啲失準，四人受訪時，李佳芯、6號及黃俊豪起哄紛紛送上恭喜，袁文傑覺得好開心，同時讚其餘３位參賽者均付出好大努力，袁文傑續道：「據我所知我哋呢一round相對比較平衡，嗰個發揮及水準，覺得黃俊豪係好勁，進步好大。」

講到入決賽均係《愛‧回家》成員，袁文傑笑說又會咁啱：「冇咩計，決賽都係盡力，不過唔知大家有冇好似我咁，我試過拎住條片出嚟完全唔開聲，就咁純粹睇佢哋個嘴同郁動，好多時夜晚臨瞓前就係咁樣對，唔可以開聲，怕嘈住籬離瞓覺。」6號指可能袁文傑用呢個方法練到聲好準，佢反而一直聽住影片啲聲，李佳芯則覺得最難係夾口形，始終係一take，壓力集中嗰個moment。