林鈺洧奪2022港姐后冠 許子萱成三料亞軍 大熱梁超怡僅得季軍

《2022香港小姐競選決賽》於25號晚圓滿結束，最終由8號林鈺洧奪得后冠，成為第50屆香港小姐冠軍。而亞軍則由4號許子萱奪得，佢同時亦贏得國際親善小姐。14號梁超怡就同時獲得季軍同最上鏡小姐，13號邢慧敏就經佳麗互相票選下成為今屆友誼小姐。

比賽中一直表現穩定嘅林鈺洧，喺問答環節入面，被司儀要求做出「喜怒哀樂」嘅表情，表現出色令人留有深刻印象。其中一個環節各位佳麗以昔日港姐參選着過嘅戰衣現物，其中林鈺洧就着上李珊珊參選時所穿着嘅露肩tube dress，佢喺出場旁白講到，負責服裝嘅同事同佢講，候選佳麗當中，只得佢可以着到李珊珊嘅尺碼，所以林鈺洧話自己可以叫做「史上身材第二最好港姐」。

賽前一直被視為大熱嘅13號邢慧敏及1號徐麟，呢晚則大熱倒灶，前者喺首輪被淘汰，無奈於10強止步； 而徐麟則成功躋身5強，但未能殺入三甲。

由於今年喺港姐50周年，除咗司儀陣容鼎盛外，一班歷屆港姐亦都盛裝打扮到場撐一眾小師妹，而呢晚嘅表演嘉賓亦相當有睇頭，當中包括黎明、草蜢、JW王灝兒、林二汶、《聲夢》學員等，而黎天王更加係坐住像真度極高嘅「港姐航班」登場，甚具睇頭。至於下月開騷嘅草蜢，就話今次擔任港姐喺紅館舉行嘅決賽嘉賓，算係為佢係個紅館騷做熱身預演，睇到現場觀眾熱血沸騰。

至於《聲夢》同《聲夢2》學員就表演以追夢為題材嘅短劇，又同一班佳麗合作演出新歌《Hat Trick》，不過呢晚After Class就只有三位現身，Yumi鍾柔美因為被列為密切接觸者，令佢無奈缺席，Gigi炎明熹就話有短訊問候對方，仲代Yumi報平安叫大家唔駛擔心。而Windy詹天文就話因為怕成為豬隊友累到大家，所以事前排練咗好多次記熟走位，Chantel姚焯菲就話雖然《Hat Trick》隻舞好難，但係只要多練習就自然記熟喇。

同林二汶一齊打頭陣嘅JW，以一條復古Tube Dress出場震撼觀眾眼球，加上整個表演極度enjoy咁唱歌，令大家都不禁擔心佢會走光。事後JW接受訪問時，就話自己出場時做足檢查，確保唔會走光喇。