李璨琛同老婆梁志瑩（Sophia）嘅4歲女兒李元元（Lucy）一向深受網民愛錫，而「李老母」Sophia不時喺網上貼出Lucy可愛又鬼馬嘅照片，配上有趣Caption，令愛女Lucy網絡人氣頗高。
噚晚Lucy媽貼出大肚相，趁老公李璨琛正日生日，宣佈再懷孕，圈中好友葉佩雯、連詩雅、周勵淇、袁偉豪、吳日言、鄭希怡、車婉婉、江美儀及蔡卓妍等紛紛留言恭喜。
究竟係唔係「Lucy2.0」，就暫時未揭曉！Lucy媽笑言雖然個肚唔太明顯，但佢想啲人對自己再好啲，決心要做一個無恥嘅孕婦，「讓吓位呀、扶吓我過馬路、買嘢排隊可以插隊、或者買嘢唔使畀錢呀」，Lucy媽當然係講笑搞氣氛！而相中見Lucy靠喺媽咪肚皮展露微笑，相信佢已ready做家姐。
Coffee林芊妤更爆出一件牙煙事，Coffee喺該post留言：「喂呀……我諗起嗰日見到你仲跳咗上你身，好彩冇嘢！」Lucy媽亦回覆：「係呀！笑死好彩我有一嚿腹肌頂得住！」
