第59屆台灣金馬獎公佈咗入圍名單，唔少香港優秀作品同電影人都入圍競逐今年嘅唔同獎項，早前喺香港電影金像獎連奪幾個獎嘅《智齒》，亦都獲大會14項提名，仲成為今屆嘅提名之冠。

而近年專注電影演出嘅張繼聰亦憑喺《窄路微塵》嘅演出，同女主角袁澧林雙雙入圍爭影帝影后，首次入圍嘅阿聰仲會同黃秋生、林家棟一齊爭奪影帝寶座呀。至於喺《緣路山旮旯》演出備受讚賞嘅余香凝，亦都首次入圍最佳女配角。

另外柯震東首次執導嘅作品《黑的教育》就獲包括最佳新導演在內嘅4項提名，而歌手出身嘅周興哲拍戲同樣有唔同成績，佢喺《我吃了那男孩一整年的早餐》演出就被提名最佳新演員喇。

身為超級英雄迷嘅柯震東，早前終於夢想成真為蜘蛛俠配音，呢日佢就同有份參予配音嘅王淨一齊出席宣傳活動，仲同大家分享呢次配音嘅體驗呀！

由於在場傳媒問到二人係咪連劇中打鬥嘅聲都要配埋？柯震東就即場示範「啊啊聲」畀大家聽，唔睇住個訪問畫面真係好易令人諗錯隔離，難怪喺柯震東身旁嘅王淨都聽唔落去話：「好啦！」點知柯震東就擰轉頭反問王淨有冇特別練習呢啲聲，搞到王淨尷尬到行後幾步，兼拍打柯震東隻手呀！

同曹佑寧熱戀緊嘅王淨，被指成個人嘅氣場都變得唔同，柯震東就話覺得對方正咗，之前合作拍《月老》時係走健美風，而家變成「辣到不行」。至於講到下月就係自己嘅32歲生日，柯震東就表示又唔係啲咩大壽，所以冇咩特別呀。