藉香港回歸祖國25周年嘅重要時機，TVB製作特備節目《看見家書》，由顧紀筠主持，將於10月1號及10月8號晚上10點半播出。節目請來7位來自各階層嘅人物，有殿堂歌手林子祥（阿Lam）、十大傑青視障女高音蕭凱恩、香港婦協主席何超瓊、香港女子乒乓球隊主教練李靜、香港婦協創會主席暨永遠名譽主席林貝聿嘉、溢達集團董事長楊敏德及全國政協委員霍啟剛。
《看見家書》緣起於香港婦協收到25封來自各階層人士嘅家書，憶述各自喺回歸路上嘅經歷，對未來的願景。首集打頭陣出場兩位嘉賓係阿Lam及蕭凱恩。阿Lam媽咪近日因病入院，當佢為99歲媽咪執屋時，竟然發現自己16歲嗰陣，喺香港寫畀媽咪嘅信，當時媽咪遠在美國，阿Lam喺信中提到與細佬喺香港生活幾好，又講吓父親林達志近況，又話好開心收到媽咪寄過嚟嘅書包，字裏行間仍難掩對媽咪嘅思念，佢更叮囑媽咪工作別太辛勞，不用擔心兩兄弟。
阿Lam事隔57年再次執筆寫信畀媽咪，笑言幫佢執屋，見到一屋都係「垃圾」，話「執極都有」，阿Lam講到自細同細佬已經覺得媽咪好前衛、有型，不單止識跳舞，又同師傅學瑜伽。信中提到阿Lam細細個就被媽咪帶去睇貓王嘅戲及聽貓王嘅音樂，阿Lam未夠10歲就扮貓王唱歌，種下對音樂嘅狂熱，奠定日後歌唱事業基礎。
阿Lam又同媽咪講到近日搵到一批印有「西醫林達志」嘅玻璃藥水樽，令林德信（Alex）跟爺爺連繫起來，原來阿Lam爸爸係一名西醫，爸爸喺元朗執業，阿Lam話︰「媽咪，我話畀你聽，喺元朗廢屋度，有人搵到啲好特別嘅嘢，搵到爹哋嘅藥樽，唔知佢點知，所以Alex就聯絡到佢，攞到呢個樽。」阿Lam特別提到喺外國住咗一段長時間，最終選擇返港，因為呢度有許多美麗回憶，屬於自己嘅家，信入面阿Lam自爆「乳名」，想知道更多佢嘅兒時秘密，記得留意《看見家書》。
另外，蕭凱恩開朗活潑，原來試過懷疑自己，蕭凱恩喺家書提到自己曾問爸爸「睇唔到嘢係咪代表冇用㗎」，蕭爸爸堅決而肯定同阿女只要努力，亦可以貢獻社會，蕭凱恩又記得報名天才表演節目時，蕭爸爸又話「中國人就梗係參加中國版」，失明係不幸，但蕭凱恩慶幸一路以嚟有父母同行，從搵音樂老師到找點字樂譜等。今年蕭凱恩參與香港特區成立25周年主題曲《前》的演唱，蕭凱恩話會好似歌詞一樣「把握機遇，邁步向前」。
