藉香港回歸祖國25周年，TVB製作特備節目《看見家書》，由顧紀筠主持，上周六播出第一集，聽晚10點半翡翠台播出第二集。上集嘉賓係殿堂歌手林子祥（阿Lam）、十大傑青視障女高音蕭凱恩、香港婦協主席何超瓊、香港女子乒乓球隊主教練李靜，憶述各自喺回歸路上嘅經歷，對未來願景。
今集出場嘉賓分別有香港婦協創會主席暨永遠名譽主席林貝聿嘉、溢達集團董事長楊敏德及全國政協委員霍啟剛，重量級嘉賓陸續登場。前行政會議成員楊敏德，曾當上美國商業雜誌《福布斯》封面，拍攝當日一頭銀髮嘅楊敏德配上一襲紅色碎花旗袍，年屆70依然精力充沛。
楊敏德傳承父親嘅紡織事業，有「棉花公主」美名，秉承家族教誨將集團3萬員工視為一家人，「溢家人」亦係今次佢寫家書嘅對象。楊敏德喺信中提到跟新疆嘅淵源始於1995年，當時佢係第一位去當地採購棉花嘅港人；面對目前國際對新疆棉嘅指控，令楊敏德感受到「成也新疆、敗也新疆」，不過楊敏德信心仍冇半分動搖：「一啲不符事實嘅指控令大家都感到委屈同憤怒，但大家都挺起腰背，以行動實踐願景」。
楊敏德回想27年前到新疆，向農民以現金收集棉花，有別當時派「白條紙」記數陋習，佢談及到新疆投資係一生人最引以為傲嘅決定。雖然近年唔少品牌對新疆棉花避之則吉，被唔少歐美客戶拒用，佢以「問心無愧，諉譽由人」作答，專注內地市場發展。
另一位出場嘉賓係現年94歲嘅林貝聿嘉，喺「兩個夠晒數」年代，佢擔任過香港家庭計劃指導會首任總幹事，林太講到1993年成立香港婦協嘅初心，其中一個原因係1997年臨近，香港即將回歸祖國，部份人感到憂慮而移民，產生好多家庭問題，婦女身受其害，促使林太成立香港婦協。
婦協宗旨包括團結婦女，留港建港，林太1995年引入《消除對婦女一切形式歧視公約》，促成日後嘅平等機會委員會同婦女事務委員會成立，信中提到5年前獲何超瓊接棒成為香港婦協主席，協會工作由地區走向國際，進入另一層次。
《看見家書》十月八日晚上十點半翡翠台播出