陳瀅擔正TVB台慶劇《美麗戰場》，獲葉念琛睇好佢攞視后，近日接受網台節目訪問， 《美麗戰場》講一班女人勾心鬥角，用啲不同手段上位，陳瀅自爆親身經驗，慘遭某位女藝人放冷箭，向高層篤背脊，而經理人仲大爆陳瀅嘅飯局價，稱成日凌晨收到啲呻吟call！
陳瀅稱嗰位女藝人上咗某位高層阿姐間房，喊晒咁話唔明點解要畀陳瀅演某劇集，陳瀅坦言：「我喺度辛苦咁多年，佢又唔係咁好喎，聽講佢又成日遲到啦，佢又呢樣嗰樣……」後來呢位女藝人篤背脊行為傳到陳瀅耳中，陳瀅並冇受此事影響心情：「一定係聽返嚟，我覺得好多人都好錫我，知道真正嘅我係點樣！」陳瀅又話拍《美麗戰場》對住葉念琛好辛苦，但係戲中初戀太似真實經歷，拍到打冷震，「我好記得我同Aska（張馳豪）嗰段關係，令我諗起我同我之前個男朋友一啲經歷，同埋我哋嗌交嘅一啲位，似到我會打冷震」。
陳瀅拍戲以來看似一帆風順，原來最委屈係佢俾人打咗廿幾巴掌，陳瀅回想：「真係打咗好多次，不必要嘅多次！有一次因為嗰個男演員比較新，導演話照打落去啦，當時我係好新，好似打咗我十幾廿巴，打到最後嗰幾巴，我忍唔住真係好委屈，好想喊，因為真係好痛，最後係畀人剪走咗，我最唔開心係畀人剪走咗成段戲！」
講到陳瀅有兩個花名「肥瀅」同「淫瀅」，佢就唔太介意：「我睇慣咗啦已經，其實第一個係肥瀅，我認嘅，因為真係唔瘦；淫瀅呢，以我所知係因為《痞子殿下》，蠻儀個角色係好麻甩，又摸朱仔（朱敏瀚）想搞佢呀，咁就會創造到陳瀅好淫呀！」
此外，講到外界有指「五大花旦」分別係陳瀅、蔡思貝、湯洛雯、龔嘉欣同高海寧，陳瀅覺得自己排位係點：「第一，一定係思貝啦，因為思貝已經係兩年前嘅視后，之後龔嘉欣啦，嘉欣好似做咗最喜愛女角色，之後就湯洛雯、我同高寧，我會揀高寧先，之後就係阿湯，我自己最尾！因為我係咁多個之中年資最短，佢哋早入行過我㗎嘛！」
講到緋聞男友方力申、周嘉洛同羅天宇，如果要選一個老公、男朋友同一夜情對象，陳瀅笑言一夜情可唔可以揀第二個：「一定係朱敏瀚，因為佢呢排真係操得好fit！」而陳瀅稱揀周嘉洛做「男朋友」，因為二人多話題，；揀又專一又好乖嘅羅天宇做「老公」，相反陳瀅覺得同方力申唔係好夾，對方感覺好大男人。
最後問到陳瀅有冇收過飯局價、陳瀅請經理人Monica親自解答，經理人爆料稱有人開過七位數字：「話七位數都畀得起㗎，淨係食個飯，我使乜問佢（陳瀅）啫，佢都唔係嗰種等錢使嘅人囉！」經理人又指成日收到好多奇怪訊息，因為陳瀅社交平台嘅contact係經理人管理，經理人試過凌晨兩、三點有啲男仔打電話嚟，然後喺度呻吟發出「呀、呀、呀（喘氣呻吟聲）」，令陳瀅經理人好無奈。