After Class成員炎明熹(Gigi)、姚焯菲(Chantel)、鍾柔美(Yumi)、詹天文(Windy)與Johnny Yim(嚴勵行)呢日組隊上遊戲節目《思家大戰》，迎戰KK張國強帶隊嘅「430穿梭機隊」，睇開呢個節目嘅觀眾都知嘉賓一定要轉數夠快，姚焯菲(Chantel)指佢哋組轉數最快係Johnny老師，因其數學比較好。

而「火星女孩」Gigi即唱出杜德偉與葉倩文《信自己》為自己打氣，又指要相信隊友，剛才綵排時感覺唔錯，Gigi笑言：「就係有啲按鈕要撳，但係冇撳到。」Gigi一改招牌齊蔭造型，稱係團體構思換新look畀啲新鮮感大家，Gigi笑言：「我自己接受程度幾高，每一期嘅服裝都非常滿意，希望畀大家唔同嘅感覺。」Chantel同Windy覺得Gigi一向比較百變又可愛，襯每一個造型都靚。

譚玉瑛上次現身《思家大戰》落敗收場，呢次捲土重來，跟好友張國強及黎芷珊等組隊，譚玉瑛對隊長張國強非常有信心，張國強指佢哋贏默契：「40年前係呢班人，40年後又係呢班人。」身邊黎芷珊同譚玉瑛提佢唔使講年份。

同日錄影有《聲夢傳奇2》任暟晴(Jasmine)、黃洛妍(Janees)及趙小婷(Pamela)，仲有來自馬來西亞及澳洲嘅「聲夢交流生」，嚟「聲夢交流生」將同《聲夢2》學員上演踢館賽，不過Jasmine、Janees同Pamela表示未驚過，Janees更化身旅遊大使，盡地主之誼帶隊遊玩，Jasmine覺得自己會喊，因為大家相處好耐，第一次開騷係好好嘅回憶。

日前一集《思家大戰》由《超級毛特兒大賽》嘅主持 向海嵐 周奕瑋 黃嘉雯 鍾柔美 同寵物專家 黃浩倫 組成嘅隊伍大獲全勝，事後佢哋依然非常開心，連訪問都一樣咁興奮，仲話蜥蜴係佢哋嘅致勝關鍵呀。

至於獎金會點分配運用，Jarvis就搞笑話辛苦比賽得獎唔會請同事食飯，仲話因為上次同娛樂新聞台主播組隊參賽未能得獎，所以呢日受訪時都被仇視呀。