區瑞強親解個唱邀袁偉豪演出之謎 與譚嘉儀合唱打破年代界限

區瑞強於10月底舉行三場演唱會,專登邀請譚嘉儀及麥潔文做個唱嘉賓,呢日一齊進行綵排,區瑞強同譚嘉儀合唱《陪著你走》打破年代界限,譚嘉儀感謝區瑞強給予好多演出及合作機會,區瑞強指未識譚嘉儀時,喺電視聽到佢唱《今宵多珍重》時已開始留意,覺得佢唱經典歌唱得好好。


而區瑞強請袁偉豪及張寶兒做嘉賓,區瑞強解釋:「袁偉豪識咗好耐,耐到佢係細路仔嗰陣,我已經識佢,我識佢老竇同啲長輩Auntie,佢鍾意彈電結他,嗰時佢都未入TVB做戲,仲未參加香港先生,我嘅嘉賓全部都唔係新相識,全部有感情喺度。」

區瑞強從事廣播45年,呢次開騷請咗幾位DJ好友鄭丹瑞、鄭子誠同麥潤壽齊齊撐場,佢指電台人唔一定唱歌,大家可以喺現場聽吓佢哋嘅讀白聲,佢又搵到好友麥潔文,細說昔日去美國登台嘅點滴,當時朝夕相對時光,區瑞強講起可惜嗰次麥潔文老公江華冇一齊過去,麥潔文笑稱當時未識江華,區瑞強即笑說:「咁我錯失機會。」

 相關推薦