Do姐承認離開效力44年公司 強調與TVB仍屬友好關係

今日傳出Do姐鄭裕玲將會離巢TVB消息，為免以訛傳訛，Do姐今日喺電台節目中親自解說呢件事。上月剛滿65歲嘅Do姐，喺節中內表示自己效力咗TVB 44年，由於近年疫情關係，令佢心態上有所改變，期望展開新生活，所以先決定約滿後唔再續約，Do姐話喺TVB工作咗咁多年，佢都好唔捨得啲工作人員同藝員同事。

Do姐一開咪已澄清唔續約一事，佢本來覺得好少事，但係佢怕以訛傳訛，所以一次過喺節目解答所有問題，佢知道好多朋友擔心，但Do姐經歷3年疫情令佢心態改變：「雖然我覺得佢對我好好，唔適合嘅節目都可以唔做，但係你同公司合作，要有合約精神，唔係想去旅行、想玩幾耐都得。」

Do姐又話簽44年約咁耐，佢好想試吓自由身嘅感覺係點，絕對唔係同邊個合作唔開心，如果將來有啱做，佢都會接拍繼續效力TVB，只係以後唔再簽長約形式，講到有咩唔捨得，Do姐坦言會掛住工作人員同藝員同事，Do姐稱唔續約一事：「諗就諗咗好耐，天下無不散之筵席，掙扎咗好耐，邊間公司可以工作44年，同高層傾過，最後係開心，冇任何hard feelings。」

Do姐指呢段時間好多同事走咗，亦因為咁令佢唔想被合約綁住：「如果有啲我想做，又因合約關係，我做唔到就覺得可惜。」Do姐亦唔排除同任何機構合作，好想試吓新嘢，佢笑住講：「有咩想搵我就DM我IG，咩都可以傾。」

講到佢做電台節目都係星期一至星期五開工，Do姐表示自己好鍾意做訪問，可以增進知識，而且電台節目有4個同事，佢笑言：「如果我想放長假都冇咩所謂。」Do姐曾講過去旅行好少為自己去旅行，通常係做節目開工，佢而家等「0+0」開關先準備去長旅行，暫時只計劃去短途旅行，亦隨時歡迎大家搵佢合作。

被問到Do姐喺TVB有冇咩節目未試過，佢話：「44年以來咩都試過，而家渴望有啲另一方面嘅喺出面做到。」Do姐事前有同助手嘉蘭傾過，起初助手勸佢再考慮吓先，後尾助手亦支持佢嘅決定，佢亦再次講只係合約滿咗， 覺得呢個時間冇再續約係啱timing，最後送上《Thanks For The Memory》嚟作總結。