《莎莎婦女銀袋日2022》將於11月6號喺沙田馬場隆重舉行，國際三級賽事莎莎婦女銀袋賽係全城矚目年度賽馬盛事之一。每年《莎莎婦女銀袋日》除咗吸引馬迷進場之外，城中名媛淑女亦盛裝出席，華麗登場，當日訂座並入場，可獲指定紀念襟針一個，亦可到「靚人自拍區」影靚相，展現迷人魅力。
今年邀得香港小姐冠軍陳凱琳（Grace）擔任活動形象大使，呢日陳凱琳為活動拍攝宣傳短片，以多套華麗服裝配上獨特帽飾現身沙田馬場，出動友情牌邀真閨蜜齊齊亮相，三人拍攝時流露真摯友情，互相提點，更即興設計舞步，默契十足。
陳凱琳第二次參加該活動，更首度擔任活動形象大使，陳凱琳既開心又興奮之餘，更感到責任重大，因為當日參與盛事嘅賓客均悉心打扮入馬場觀賞賽事，女士會戴上華麗別緻嘅帽飾爭妍鬥麗，佢希望當日所有入場賓客及馬迷感受到馬場開心熱鬧嘅氣氛。
陳凱琳一向鍾情粉紅色，帶畀人開心嘅感覺。拍攝當日為咗配合活動主題，佢以三個不同造型嘅粉紅look亮相，包括優雅大方嘅淡粉紅短裙、高貴亮麗嘅粉紅tube dress及型格嘅螢光粉紅套裝，以高雅曼妙Pink Lady姿態喺沙田馬場亮相，盡顯獨特迷人嘅魅力。
陳凱琳大方分享戴帽心得，戴上帽子和不同戴法可以修飾面型，今次成為形象大使，可以趁機會喺拍攝宣傳片同賽事當日盡情試戴各款貴族氣派嘅帽飾，夠晒華麗典雅。陳凱琳更對一頂飾以立體花卉嘅帽情有獨鍾，笑言有如走進Rose Garden一樣，令人歡愉。
陳凱琳不時喺社交平台分享時尚穿搭同美容心得，佢坦言試過重溫舊照時覺得以前穿搭「出問題」，隨著年齡同生活經驗嘅改變，佢慢慢搵到適合自己嘅裝扮風格，愈簡單嘅裝扮愈能突出自己嘅優點，例如喜歡自己嘅鎖骨，就穿上Tube dress來突顯鎖骨，而另一打扮重點就係舒服，因為連自己都著得唔舒服，別人都會感覺到。
陳凱琳作為兩子之母，平日打扮以舒服為主，方便照顧囝囝，反而出席活動先比較緊張，無論顏色、配搭、髮型都希望配搭到最好。幸福人妻嘅陳凱琳大方表示：「有時會問老公意見，通常佢覺得OK，自己就會好有信心出席活動。」
被問會唔會幫囝囝同老公配襯打扮，陳凱琳坦言可能小朋友係男仔，對於囝囝衣著唔太著緊，自從畀小朋友自己揀衫之後，小朋友每日都要求著同一套衣服，陳凱琳笑指趕唔切洗同晾，而老公鄭嘉穎通常喜歡 casual打扮，有自己喜歡嘅服飾。
講到邊一個裝扮最令佢充滿難忘回憶，陳凱琳笑言係結婚當日所著嘅婚紗，想到著婚紗時會動腦筋，希望令自己跟平日唔同，當時選擇超級浮誇公主路線，著咗一條好重、好長嘅裙。現在回想嗰套婚紗係我最滿意、最喜愛嘅一條裙；至於Grace心目中美麗嘅典範就係佢媽媽，因為媽媽由心中至外在都能表達喜悅、快樂嘅心態；被問到如果有機會成為馬主，會為愛駒改什麼名字，Grace答道：「會取名為『Joy』，因為這個名字易記，同時是一個代表開心的名字。」
「莎莎婦女銀袋賽」，前稱婦女銀袋賽，於1846年首次舉行，為本港其中一項歷史最悠久嘅賽事。早在百多年前，參與「婦女銀袋賽」嘅名媛淑女均盛裝出席，爭妍鬥麗。根據當時傳統，於「婦女銀袋賽」勝出馬匹嘅馬主、練馬師及騎師均可獲頒發純金金幣作獎勵，並由一位名媛擔任頒獎嘉賓。近年此項傳統已改為將藏有一枚金幣嘅銀袋贈予騎師、練馬師及馬主作紀念。