高Ling帶隊玩爆《獎門人》 Ali慘被嘲又窮又冇人要

今晚一集《開心無敵獎門人》將由「高Ling條長隊」嘅 高海寧 (高Ling)、 李佳芯 (Ali)、 黎諾懿 、 糖妹 (黃山怡)同 關曜儁 (Leo)同「東張西望隊」嘅 林溥來 (Patrick Sir)、 區永權 (Albert)、 游莨維 (一蚊Joe)、 吳幸美 同 陳懿德 (Rachel)分別出賽。

出戰前受訪自嘲「轉數慢」嘅高Ling原來好古惑，除咗喺「開心無敵拍蛋蛋」環節中 「偷雞」拍打Patrick Sir頭之外，玩「開心無敵拍拍拍」時又出「陰招」分散Rachel注意力，受害人Rachel仲被獎門人寸「人蠢冇藥醫」，之後就連隊友Albert都請佢食檸檬。

不過雖然 「干擾」策略成功，但之後高Ling被一蚊Joe踢爆「走數」要補食「辣辣壽司」，點知高Ling再出招賴皮又撒嬌，夾硬餵獎老程浩駿食塞滿Wasabi嘅壽司飯，忽然「幸福降臨」嘅程浩駿竟然嘴角含春乖乖張開口就範，激到獎門人發火：「你唔使返嚟喇！」場面搞笑。

曾經喺《仨心友行 3》自認唔識嗲男友嘅Ali，喺「開心無敵爆大波」環節被逼挑戰弱項，題目仲要叫佢講「10句嗲男人嘅說話」，而高Ling亦出手教Ali以獎門人作假想對象，識做嘅Ali秒轉「娃娃音」連環大讚獎門人：「好靚仔」、「你好叻呀」、「好勁呀」，可惜後勁不繼，最終仲被大波波嚇到暴走。

諾懿就喺大波波壓力下引發「爆料」潛能，「唱」完高Ling有好多樓揸手後，又揭Ali又窮又冇人要，場面爆笑。之後嘅「開心無敵彈遮遮」環節，仲首次安排全部嘉賓「無雨衣」上陣，結果淋到糖妹慘叫：「底褲都濕埋。」諾懿仲由白Tee變See-through，仲獲獎門人抵死賜封做「BLACKPINK」！ 

而呢集「開心無敵呼拉圈」派出兩隊高妹，有高Ling加諾懿對決吳幸美加Patrick Sir，落足力 玩嘅高Ling仲除低外套應戰，至於吳幸美一出場就被獎門人挖苦「好鬼重」又「笨拙」， 結果Patrick Sir一抱就情管理失控，仲忍唔住「嘩」咗一大聲，似乎非常痛苦咁呀。

記得一陣20:30，留意《開心無敵獎門人》睇Patrick Sir點玩到唞晒大氣，及高 Ling 被拋圈圈的震撼場面啦。