年度籌款節目《星光熠熠耀保良》22號舉行，大批嘉賓包括身兼主持又同Yumi合唱嘅汪明荃輪流上陣表演，日前傳出Do姐鄭裕玲婉拒續約，同TVB結束44年嘅合作關係，呢日Liza姐就話知道後非常驚訝喇。

Liza姐又話往後相信依然會有機會同Do姐合作，又讚新一輩女主持表現不俗，假以時日一定可以有更好表現，仲話自己啱啱已經續約兩年呀。

4年前同黃心穎喺《保良》舞台合唱嘅許志安，喺正式復出之後呢日亦喺《保良》舞台重新出發，呢日戴住婚戒出現嘅佢，雖然未有正面回應過往舊事，不過就對新歌成為電台流行榜冠軍非常開心，仲話對自己係非常大鼓勵喇。

佢又提到希望明年上半年推出新全新EP，又話老婆Sammi一直喺身邊鼓勵，自己非常感激呀。

呢日After Class四小花都有現身，Gigi炎明熹對《聲夢2》嘅成員將會面對海外學員嘅踢館賽，就回憶起自己當日參賽時嘅片段喇，而Yumi鍾柔美同Windy詹天文呢晚分別同Liza姐仲有露雲娜合唱，Yumi就話心情比上一次同阿姐放騷鬆咗唔少，Windy就話自己擔心冇戀愛經驗唱唔出《豆芽夢》嘅感覺呀。

「志明」張馳豪喺《美麗戰場》嘅表現獲唔少觀眾讚賞，原來就連Chantel姚焯菲都一樣有追，仲話非常鍾意阿寶同家明呢一對呀。Aska就話佢同阿寶之間之後仲會有啲事發生，仲話想嘗試吓做衰仔嘅角色呀。
泳兒嘅新歌繼續暗黑風格，不過呢日佢就話同現實中嘅自己有唔少嘅反差喇，仲話情侶之間一鬧交自己就會即喊呀。而馮允謙亦都推出同人生選擇有關嘅新歌，佢仲希望大家可以勇往直前呀。

呢日谷胸現身嘅譚嘉儀12月就會展開佢嘅處女音樂會，近日佢就為舞蹈不停苦練喇。至於準陳太連詩雅早前確診，仲搞到佢非常焦慮，因為工作安排損失唔少嘅佢，仲話緊張到日日自己檢測呀。

再次推出高質錄音專輯嘅陳逸璇透露新碟銷量不俗，佢仲話即將會推出另一格式嘅新版本，明年仲會推出黑膠唱片呀。

慈善籌款節目《萬眾同心公益金》6月3號晚圓滿結束，多位嘉賓為慈善落力表演，好似 炎明熹 《中年好聲音》嘅 周吉佩 李佳 龍婷 羅啟豪 顏志恒 吳大強 等，加埋 陳美齡 譚嘉儀 曾比特 朱主愛 余宗遙 鍾柔美 ，而近年甚少公開演出嘅 張德蘭 呢日亦罕有登台為慈善出力，仲話非常留意《聲夢》同《好聲音》參賽者嘅演出呀。

呢日唔少參與歌手都把握機會同佢合照，當中梗係唔少得Gigi啦，而Gigi仲大爆平時極少同藝人合照嘅姑丈，呢日都公開要求集郵，Gigi仲笑返怕醜姑丈轉頭呀。

Yumi好快就會踏入中學最後一年，近日正埋首溫習考試嘅佢，就話已經開始對來年嘅DSE感到緊張，仲話會好好安排時間準備，不過大家亦唔使擔心，因為佢同Gigi都好快會有新歌推出喇。

早前往美國登台開騷嘅 許志安 呢日都係表演嘉賓之一，佢亦現場獻唱新歌，受訪時亦提到重訪一廠見到現場觀眾令自己憶起當年，又指即將會喺新加坡開騷，亦正籌備香港嘅表演，不過估計就要出年先可以成事喇。

《中年好聲音》嘅幾位成員呢晚由過去嘅觀眾變成表演者，佢哋都覺得非常開心，仲話感覺非常有趣呀。羅啟豪呢晚就再同媽咪同台演出，不過羅媽媽就話非常緊張喇。龍婷同李佳呢晚亦大展歌喉，不過去到後台就變成小Fans同各位前輩見面合照喇。

新時代歌手阿Mike亦都同朱主愛仲有余宗遙合作，仲爆不時狂Loop朱主愛嘅網絡神曲咁話呀。