適逢慶祝TVB台慶55周年、及香港小姐競選踏入50周年推出嘅真人騷綜藝節目《香港小姐再競選》，將喺周六（29日）晚八點半播出，由司儀界後起之秀周奕瑋、鄭衍峰、黃庭鋒及林正峰擔任司儀，為隆重其事，大會請咗陳百祥、仁愛堂主席鄭慧賢博士、2008香港小姐旅遊大使高海寧、熱播劇《美麗戰場》編導及監製葉念琛，以及藝人袁偉豪擔任評判，並邀得陳曉東、前港姐樊亦敏、吳幸美及蘇韻姿擔任表演嘉賓。
樊亦敏一年內勁減40磅成為焦點，當晚以一襲灰色晚裝裙會見傳媒，及後換上超貼身半透視連身裙以師姐身份，帶領師妹吳幸美、蘇韻姿及現場14名佳麗齊齊獻聲，艷壓群芳。相關壓軸表演環節，主要係向歷年來雖然冇成為三甲，卻從沒放棄堅持追夢，及後對演藝界貢獻良多嘅佳麗們致敬，隨住樊亦敏感性開場白：「每年可以得到港姐后冠只得三位佳麗，但只要大家唔好放棄一齊努力，或者會得到比起后冠更加珍貴嘅獎賞。」
接著大會剪輯多位歷年來冇奪得三甲嘅港姐參賽片段，包括趙雅芝、周海媚、邱淑貞、郭可盈、張可頤、陳妙瑛、麥美恩、湯洛雯、陳芷菁、何婉盈及郭少芸，當中有演技備受公認嘅實力演員，也有司儀及主持界人材，配以一眾佳麗手牽手、互望互勵畫面，頗為感人。
事後樊亦敏受訪時坦言能夠參與是次盛事份外感動及勾起不少昔日參選點滴，佢回想參選港姐前，自己好似一張白紙咁，但參選咗港姐後就眼界大開，選美唔單止係訓練個人，仲係鍛鍊大家同群體一齊成長，蛻變成更成熟更美麗更有智慧；佢真心祝福歷年來所有港姐可以擁有美麗璀璨嘅人生，為現場嘅參賽佳麗感到驕傲。
當晚表現最令人眼前一亮嘅，就係現年35歲嘅2011年參選港姐李天縱，及現年34歲嘅2007年參選港姐麥皓兒。已為人母嘅李天縱身形依然fit到漏，更比11年前輕咗2公斤。
事後李天縱受訪時笑言生完小朋友後，體重一度暴升至60公斤，現已回復至46公斤左右，問到減肥心得，佢話為咗今次參選，呢五個月每朝7點開始練習瑜伽。李天縱又指當得悉有相關比賽，只花一秒時間已決定參選，佢感恩終於夢想成真：「人生之中，好少有人能夠失去咗，若干年後有重來嘅機會。我希望通過呢次比賽，展示我不為人知嘅魅力、才藝、努力同堅持。」對於入行以來一直面對「廣東話發音」問題，李天縱坦言已看開：「我再練10年都會有口音，所以我就唔再糾結，我能聽得明白，表達明白就OK，可能帶口音嘅廣東話能帶給觀眾歡樂。
麥皓兒參賽期間全程獲男友蔥頭（丘梓謙）支持，雖然當年22吋「黃蜂腰」不復再，但麥皓兒依然保持住24吋纖腰，麥皓兒喺台上表示曾經為演師奶角色，一度增磅至145磅，最後與樊亦敏一樣於一年內減掉超過40磅。談到減肥心得，皓兒笑謂：「我主要做運動、冇乜節食，咁可以更有效提升代謝率，除咗每日做兩至三個鐘帶氧運動，仲額外會做肌肉訓練。」麥皓兒曾係普通話朗誦比賽全港總冠軍、香港傑出中學生、香港傑出少年，及16歲已成為18區歌唱比賽亞軍，一度被封「天生比賽狂」，不過對於今次參賽，皓兒起初帶點猶豫，後來竟因皮膚關係獲製作組睇中及支持參選：「佢哋話我啲皮膚好年青喎，多謝佢哋。」
麥皓兒又感激男友蔥頭給予不少實際支持：「今次我才藝表演係跳唱，我自己練習時，佢有提點我邊啲動作會Smooth啲、好睇啲。同埋佢再冇引誘我食嘢，佢係油浸都唔肥嘅類型，之前成日話煮宵夜畀我食。」
參賽佳麗全部均為歷年未能成為三甲嘅港姐
1號梁允瑜、2號蔡菀庭、3號陳懿德、4號黎寬怡、5號李天縱、6號李芷晴、7號賴彥妤、8號鄺靜汶、9號黃婉恩、10號王嘉慧、11號何沛珈、12號關楓馨、13號麥皓兒及14號莫韻諰