TVB全新綜藝節目《我們的主題曲》噚晚嗰集係「青春劇集篇」，請嚟黎諾懿、唐詩詠、丁子朗、劉穎鏇，及「聲夢幫」冼靖峰、何晉樂、潘靜文及林君蓮大談拍攝《四葉草》系列、《青春不要臉》及《青春本我》點滴。
「聲夢幫」更額外獻唱《四葉草》系列經典歌曲、《青春本我》主題曲，另外同屬「聲夢幫」嘅詹天文則與露雲娜合唱《荳芽夢》。
唐詩詠憶述指當年拍攝《當四葉草碰上劍尖時》，與其他演員感情要好，又指對於前往塞班島拍外景，到十分興奮，唐詩詠回想：「好似同同學去旅行咁，我哋會玩遊戲玩到成塊臉貼滿晒膠紙，輸咗嗰個要去酒店大堂度講一輪英文，我好記得嗰個係梁漢文。」唐詩詠又指十分喜歡劇集主題曲《Shining Friends》，當年拍完馬上下載呢首歌曲傍身：「首歌完全將我哋嘅情景呈現咗出嚟，我拍完之後有Download番，唔開心時會攞番出嚟聽，即刻覺得好溫暖同個人正面番好多。」
丁子朗透露當年讀中學時，碰上《點解阿Sir係阿Sir》劇組前往其學校進行拍攝，並謂對於能夠目睹陳豪真人大感興奮：「當時心諗原來陳豪咁嘅樣喎。」他又指朱敏瀚當時亦身處拍攝現場，之後能與對方在無綫成為同事感到神奇。劉穎鏇則自爆係《赤沙印記@四葉草2》粉絲，透露當年因為受劇集影響而加入排球隊。
明年邁向20周年嘅《四葉草》系列，當年成功捧紅唔少新鮮面孔，除咗唐詩詠及黎諾懿，仲有Race@2R、周勵淇、陳自瑤、黃又南、鄧麗欣、姚子羚、吳卓羲、楊秀惠、羅子溢、洪卓立、陳家樂、趙碩之及衛詩雅等，噚晚眾人青澀樣更先後曝光，當中以姚子羚最大反差萌，唐詩詠稚氣樣更相當吸睛。
每集尾聲會請來無綫藝人或歌手獻唱經典劇集金曲《我們的主題曲》，噚晚請來鄭俊弘及何雁詩夫妻檔攜手合唱《都市的童話》主題曲《傻癡癡》。製作組相當用心，安排鄭俊弘及何雁詩前後至少換咗7款不同顏色「情侶裝」，獻唱時二人互動更係甜到惹蟻。鄭俊弘事後笑指換情侶裝係監製主意，佢同老婆負責構思動作：「簡簡單單好似幾得意，可以同太太一齊拍嘢係開心嘅。」問到私下會唔會刻意情侶裝，鄭俊弘笑謂：「我哋有時都會著吓嘅，有時又會唔覺意襯咗。」
《傳承‧狂歡 55：我們的主題曲》逢周日晚十點翡翠台播映