董敬文日前接受潘盈慧《星光路上》專訪，演過無數次古惑仔角色嘅佢，近期喺台慶劇《美麗戰場》演「傻強」，與劉佩玥飾演一對相依為命嘅兩兄妹，戲份不少，原來董敬文未入行前係做公關一年半，第二次投考藝訓班先正式開始入行。

當時董敬文喺美國讀完書，回港考訓練班要排4個鐘，要求佢講一句嘢見咗一分鐘就被叫走，當初覺得獲錄取機會不大，之後佢辭去公關工作，再次投考藝訓班，入房見到旦哥、樂小姐及添哥，董敬文稱成個人震緊，仍要保持笑容，最終獲得second in，樂小姐對佢嘅評語係「你個頭真係好大」，董敬文認為係開啟溝通嘅一道門：「之後我話我個人鍾意將好睇嘅嘢放大。」潘盈慧笑指可能係呢一句令董敬文拎到呢一張恨咗好耐嘅藝訓班入場券，開展演藝之路。

董敬文指喺TVB成日要演壞人：「做到越嚟越高級，由嘍囉做到有兩條𡃁，再做一個大佬仔，再變成真正嘅大佬，成魔之路原來係咁嚟。」董敬文印象最深係拍《純熟意外》當時獲得一個好有發揮嘅角色，另一套就係《美麗戰場》，講到喺醫院揭發反骨琪偷嘢嗰場戲，導演葉念琛要求佢真打，董敬文拍之前小心要度位，決定以快打慢，打咗兩下就收貨。

寶珮如一向樂觀健談，日前接受TVB娛樂新聞台節目《星光路上》，與主持潘盈慧暢談入行經過，佢笑稱曾要求當時男朋友駱達華帶佢去電視台參觀，最終被拒絕，後來佢為實現加入娛樂圈夢想，決定參加歌唱比賽入行，獲資深電視人周梁淑怡賞識發掘，更為佢改名「寶珮如」。

寶珮如坦言入娛樂圈完全冇私人時間，但係佢有一份滿足感，慢慢愛上主持工作，寶珮如於1999年遭遇嚴重車禍，導致其下顎面骨盡碎，盤骨移位，佢接受長達7年手術及整形，日子過得艱苦，曾一度輕生，多得好友袁潔儀一直扶持，寶珮如講起好友袁潔儀即爆喊。

寶珮如2011年與相識僅2個月、任職廉政公署嘅圈外人鄧秋雄結婚，老公有日提議佢去電影試鏡，寶珮如演出《藍天白雲》有幸被提名香港電影金像獎最佳女配角，佢正式重回娛樂圈，亦開始喺TVB拍劇，令佢明白努力係有回報，目前佢覺得最重要係健康管理，做好妻子嘅責任。