曾演出多部港台作品嘅資深演員楊群不敵癌魔10月24日喺美國病逝，享年88歲。據指近年佢一直同膀胱癌搏鬥，24號凌晨喺太太同子女陪伴下離世。
楊群原名楊棚舉，1934年喺哈爾濱出生，後來因為戰亂移居香港。15歲已經加入電影圈參演無數作品嘅佢，60年代就因為參演李瀚祥嘅作品而爆紅，1969年憑《揚子江風雲》首嘗金馬影帝滋味，到1973年再因為《忍》嘅演出而再度封王。
後來佢同太太俞鳳至成立電影公司，製作嘅作品一樣令佢成為金馬常客。楊群80年代返港參與多部電視劇演出，喺《千王之王》嘅「北千手」卓一夫一角最為人熟悉，近日重播嘅《大都會》當中，佢扮演嘅凌顯光亦令唔少觀眾留下深刻印象。
之後楊群又轉職亞洲電視繼續演出唔同作品，到90年代中期後逐步減少演出移居北美，不過戲癮未減嘅佢就不時會客串演出。