美麗戰場丨陳瀅拒合作激嬲葉導 反骨琪指殺清光版本機會不大

台慶劇《美麗戰場》步入結局篇,劇情越嚟越刺激緊湊,陳瀅、陳山聰、朱晨麗、劉佩玥(Moon)、林盛斌(Bob)、蔣家旻、方力申、陳曉華及張馳豪(Aska)等一眾演員出席宣傳活動,玩遊戲兼派福利,仲即場煮家寶嘅定情餐蛋麵,小方更餵幸福fans食餐肉,陳瀅同Aska即興唱插曲《沒法等你》。

越近大結局越多猜測,網上流傳出多個結局版本,真正結局係咩,原來各演員都唔知,佢哋拍到最尾係「冇劇本演出」,只有監製葉念琛先知真正結局,呢日佢哋各自透露自己擁有嘅結局線索。

講到網民估反骨琪回歸殺晒所有人,飾演反骨琪嘅蔣家旻笑言呢個團滅推測幾好笑:「好有創意,我完全冇諗過,如果我殺晒所有人,大家應該好憎我,明明本身咁衰,應該要有唔好嘅下場,我就冇拍過殺人嘅戲。」

講到陳瀅早前受訪稱唔想再同葉念琛合作,佢笑稱要請食飯道歉:「導演喺隔籬,而家佢黑咗面,激嬲咗佢,佢啱啱先畀大結局,可能就係隊冧咗鍾家寶,導演,我好想再你再合作,我諗我要請佢食餐飯先得,搞唔掂!」

陳瀅指唔知其他人拍過啲咩,佢噚日睇完先知Aska同曉華煮過餐蛋麵,陳瀅表示:「咁嬲呀!我真係唔知。」Aska則透露「區家明」將重遇「鍾家寶」,今次Aska承認演技不足,仍然有待進步。

此外,林盛斌同阿Moon合作好有CP感,佢哋覺得好驚喜又開心,據知今次係葉念琛要求佢哋做CP,當時在場高層同工作人員都唱反調,認為二人唔襯,葉念琛堅持拍出嚟會好睇,而Bob爆佢同阿Moon嘅結局,令一眾觀眾覺得好窩心。