[電影泉攻略] 2022年萬聖節恐怖電影 《魔鬼之光》VS《猛鬼三寶》丨EP22

[電影泉攻略] 泉叔每周精選心水猛片 花絮加專訪全天候供應

Dwayne Johnson主演DC反英雄電影《黑亞當Black Adam》上映以嚟話題不斷，評價兩極，不過對於DC影迷最驚喜必定係片尾嘅彩蛋，見到Henry Cavill飾演嘅超人出現，因為之前盛傳前DC電影總裁Walter Hamada（濱田沃特）極力阻止Henry再演超人，不過Walter Hamada已喺10 月中離職，所以超人旗幟再次被高舉。

好多網民覺得蝙蝠俠非常有錢，但未必夠超人打，而家終於有一個夠打嘅出現就係黑亞當，今次呢場史詩式大戰唔會局限喺同一套電影，而係喺同一個電影宇宙發展一條好長嘅故事線。

另一套電影《魔鬼之光》根據梵蒂岡真實驅魔紀錄改編而成，開創恐怖新格局，講述魔鬼附身個案越嚟越多，決定重開驅魔學校，一位有天份嘅修女成為第一位驅魔嘅女性，同時要面對魔鬼引誘。

《猛鬼三寶》結集有三個都市猛鬼故事，包括劇組拍夜更戲集體撞鬼、的士司機約女友派對房間gathering，結果引來鹹濕鬼纏身、小鬼流流連就嚟清拆嘅商場唔願投胎，一眾租戶怕佢日後流離失所，合力送小鬼上路，而戲中演的士司機嘅蘇致豪同郭奕芯嗰場kiss戲，蘇致豪自爆獻出螢幕初吻畀郭奕芯。

《愛•難按捺》講述一個女子任性地搭上大叔丹尼爾，點知變咗情傾大叔嘅女友，仲有由翁子光監製、蘇玉華與林海峰（Jan）主演嘅《正義迴廊》，改編自2013年轟動全港嘅大角咀「駭人弒親案」。

另外盛傳「恐怖大師」溫子仁正籌備《詭屋驚凶實錄4》，再次原班人馬回歸，令影迷相當期待。

直至10月26號中午，票房戰況排第三位係屢創本港華語片最高票房成績嘅《明日戰記》，而黃子華主演嘅《飯戲攻心》排第二位，冠軍寶座就係DC反英雄電影《黑亞當》，強勢空降奪得。