林敏驄、江美儀及鮑起靜主演嘅《下流上車族》播出以來大受歡迎，讚劇情貼地又搞笑，一眾演員呢日出席宣傳活動，收視節節上升，眾演員有信心衝破30點。

講到網民覺得林敏驄應該今屆拎視帝，驄哥指網友畀面當攞咗，日前播出嗰集講「車氏姊妹花」郭柏姸同羅毓儀化身勁舞女僕，散發日系青春氣息，為咗練好隻舞，郭柏姸同羅毓儀因為每日要開工，郭柏姸稱冇時間練習：「驄哥殯儀館拍嗰場，我哋要喺度等，等嗰陣我哋兩個係咁跳。」

羅毓儀男友被指同林敏驄撞樣，羅毓儀笑言唔覺得佢哋似樣：「尤其係髮型，Daddy係長髮，我男友係爆炸頭，遲啲叫佢Cosplay扮Daddy。」孫慧雪則幫口話唔似；鄧智堅、關曜儁同林穎彤組「哈比人家族」喺劇中爆出唔少笑點，鄧智堅預告將發現鮑姐嘅秘密，林穎彤之前寸爆「Karen嬸」，搬返去鮑姐附近做鄰居後，林穎彤就轉戰同鮑姐鬧交，佢笑言有啲怯。

Yuki 羅毓儀 除咗早前喺《下流上車族》演出深得唔少觀眾歡心之外，近日佢亦將會進軍樂壇，而日前踏入27歲生日嘅Yuki，仲同一班Fans一齊開生日會慶祝，但係同時正拍攝《愛．回家之開心速遞》同《非常檢控觀》嘅佢，就因為幾乎趕唔切到場，好在最後都可以到場同大家見面咋。

首次同Fans一齊過生日開Party嘅佢，仲話成廿年未曾開過生日會，難怪講起都咁興奮啦。Yuki仲話新一希望健康之餘，演技同音樂上表現都有更多進步，又話希望新歌可以盡快同大家見面，仲爆出好快會喺交通工具會見到佢咁話喎。