適逢踏入台慶55周年，翡翠台自本月8日起於深夜時段推出「傳承‧經典55」系列，頭炮系列係重播數碼修復版《楊家將》、《成吉思汗》及《大都會》，勾起唔少觀眾集體回憶。今晚（29日）起一連9晚將播放一系列「經典無綫電影」，包括《諜血黃埔灘》、《霓虹姊妹花》及《八月鬱金香》等，之後緊接推出《我揀我想睇》之「我們的……」系列，另《我揀我想睇》之「難忘記……」系列，播放詳情稍後公佈。
為咗隆重其事，相關系列特別增設觀眾投選部分，為期兩周嘅投票於10月27號結束，投票結果於噚日中午12點半於TVB Facebook專頁公佈，最終由鄭裕玲（Do姐）及黃子華主演嘅《男親女愛》（2000年首播）以23.3%總票數成為「我們的...」系列第一位，於11月7日（星期一）深夜起播放高清版本。
而「難忘記...」系列則由苗僑偉（三哥）、翁美玲及劉丹主演嘅《天師執位》（1984年首播）以29.8%總票數佔據第一位。
「藍藍天空高掛我的夢……」一講起《男親女愛》，主題曲《藍天》旋即在腦海響起。一直被網民譽為「神劇」嘅處境喜劇《男親女愛》，講述「事業得意，情場失意」嘅律師Miss Mo（鄭裕玲飾）與惡名遠播嘅蠱惑師爺余樂天（黃子華飾），由鬥氣冤家發展為情侶的故事。
由於二人經常妙語連珠，加上劇情輕鬆爆笑，2000年播映期間大結局最高收視50點，觀眾人數319萬，成績斐然。除咗造就不少經典對白，包括「你同我Off啦」、「又如何」等，當年Do姐與子華長達30秒嘅「世紀之吻」亦掀起全城熱話，即使相隔22載，呢對「經典銀幕情侶」早前喺電台節目合體仍然引發騷動，令大批網民「敲碗」嗌重播《男親女愛》，相信下月勢必再掀深宵煲劇潮！
由苗僑偉與已故「一代美人」翁美玲合演嘅《天師執位》開創天師劇先河，1984年播映期間收視成績理想。該劇主要講述張天師（劉丹飾）與宣慈（石堅飾）之間嘅正邪大戰，及徒兒司徒文武（苗僑偉飾）與林楚燕（翁美玲飾）之間嘅動人愛情故事。
楚燕對文武一往情深，可惜因文武嫌棄其刁蠻，於大婚當日憤然休妻，其間文武迷戀花凝鳳（蔣麗萍飾）並慘遭利用，原本浪子回頭欲與楚燕重修舊好，可惜就在此時楚燕元神遭魔頭所奪，救妻心切嘅文武冒險修練心魔大法，可惜惹來無窮後患；由於劇集播出後好評如潮，當中經典嘅捉元神及撲蝶場口更係令人相當難忘，與「難忘記」極為貼題。《天師執位》於首播翌年（1985年）即馬上重播，翻查紀錄，該劇對上一次於翡翠台重播至今相隔已久，難怪一眾網民紛紛留言表示期待與該劇深宵「再會」。