林敏驄再次帶住《下流上車族》演員江美儀、郭柏姸、林景程、鄧智堅及關曜儁現身遊戲節目《開心無敵獎門人》作客，對戰洪永城、袁偉豪、林子超、王敏奕及蔡潔等《法證先鋒V》演員，林敏驄指目標好遠大，希望接收獎門人呢個地盤，鄧智堅稱上集阿驄做嘉賓收視好。
阿驄上次被獎門人用氣笛整蠱，林敏驄入錄影廠前話唔會報復：「離晒譜，我要claim工傷，我知唔知我耳仔好緊要，我係音樂人，我哋使咩報仇，我哋係朋友。」不過阿驄趁玩遊戲時靜靜雞去咗搵鳴笛，突襲整蠱曾志偉，事後阿驄即向獎門人耍冧
王敏奕雖然係獎門人新抱仔，但係佢就話家屬冇優待，佢笑言希望唔會拖累隊友，身邊洪永城同袁偉豪叫佢唔好畀太大包袱自己，認真得嚟又要放鬆，洪永城早前上載跟外傭姐姐嘅對話圖，指洪永城女兒Amber係「Sir face(爸爸餅印)」，洪永城笑稱：「冇辦法，我媽咪同所有親戚朋友都覺得佢好似我細個，除咗講我基因強大，我唔知仲有咩好講，佢越嚟越似太太，對眼越嚟越大、越嚟越靚。」
