《香港小姐再競選》結果出爐 向海嵐讚陳懿德有極大進步

台慶節目《香港小姐再競選》結果出爐，進身三強嘅有3號陳懿德、6號李芷晴同11號何沛珈，不過邊位係冠軍競要等到11月19號嘅萬千星輝賀台慶先知喇！

要喺14位佳麗入面選出三甲，問到三位評審陳百祥、袁偉豪同高海寧嘅準則？另哥直言講明係選美節目，一定係揀咗樣同身材都靚嘅先，至於口才嗰啲都可以後天學習。高海寧話而家嘅三甲各方面都好平均，但要佢揀冠軍季軍佢記揀嗰到出嚟，因為各有千秋呀！袁偉豪指雖然節目叫《香港小姐再競選》，但佢覺得咁多位同事嘅狀態都仿如參加緊真正嘅香港小姐咁，佢仲話好開心公司開一個節目畀咁多位同事去再發揮呀。

陳懿德為咗呢次選美入面嘅才藝表演環節花咗唔少心思，表演腹語嘅佢事後講返原來自己只係學咗兩堂時間，但已經令人嘆為觀止呀！6號李芷晴同11號何沛珈除咗入圍三甲外，佢哋就分別再奪得最進步獎同更上鏡小姐獎，何沛珈話事前只係想做好個騷，所以真係冇諗過會拎到獎，而李芷晴就話想當年自己參選時嘅才藝表演真係麻麻地，又緊張又論盡，所以今次再有機會，佢就叫自己盡量放鬆做好個表演呀！

表演狂野歌舞嘅麥皓兒，得到男友丘梓謙到場打氣，雖然最終入唔到三甲，但佢都話好滿意自己表演，仲預告嚟緊會有歌曲推出呀！

向海嵐呢晚就特登嚟為陳懿德打氣，佢讚對方進步咗好多，自信咗之餘仲可以騷到自己原來風趣幽默嘅性格。

性感造型登場嘅樊亦敏，就話因為最近自己清減咗，加上希望畀大家睇到叻一面嘅自己，所以先豁出去着呢年透視裝出嚟。