蘇玉華於1994由劇場轉簽TVB成一線花旦，2017年約滿回歸舞台劇，阿蘇近年有不少身份轉變，除咗身兼劇場幕前幕後，又到浸大表演系教書，更大轉變係成為潘太，於2020年與拍拖25年嘅潘燦良登記註冊結婚，佢接受電台節目《星光背後》講出結婚主因。
蘇玉華當年憑電影《我和春天有個約會》一炮而紅，最近出山拍電影，聯同林海峰(Jan)及一眾演藝師弟師妹合演何爵天執導嘅電影《正義迴廊》，改編自2013年大角咀肢解父母案，講到及因《正義迴廊》劇本好，佢覺得非拍不可，蘇玉華分享5年前決心離巢嘅心態：「我呢個人唔需要安全網，係去到人生某個位，我想做嘅角色都做過，係時候要去試其他工作。」
蘇玉華指《正義迴廊》與林海峰首次合作，擦出唔少火花，佢踢爆近年多次演出舞台劇嘅林海峰，主動爭取合作重演《謊言》一劇，蘇玉華亦覺得自己最滿意係《謊言》，因為時至今日，仍然有人叫佢重演，阿Jan原睇完《謊言》之後，好想演阿燦呢個角色，並唔介意好似潘燦良咁露股。
蘇玉華對於兩年前榮升潘太，至今仍稱丈夫係「潘生」，佢坦言真係唔不習慣叫潘燦良做老公：「我未慣，仍然係叫佢潘先生，有人叫我『潘太』，我都好唔慣，更怕有人叫我做阿嫂，即刻周身唔聚財。」
蘇玉華與潘燦良拍拖兼同居多年，曾揚言結唔結婚都冇所謂，但佢哋忽然兩年前突然登記註冊，蘇玉華稱首先係疫情令佢哋思考呢個問題：「疫情間我哋為劇場界做咗《不日上演》企劃後，感覺做咗件好有意義嘅事，之後諗自己生活當中，仲有冇要為自己完成？就諗到結婚，大家都覺得可以就不如做啦！我哋只做最簡單手續，去律師樓簽字，雙方家長見證，staycation咗兩日便完成。其實至今，雙方家長仲未吃過一餐飯，因為之前限聚。」
促使蘇玉華與潘燦良註冊變成有法律效力嘅夫妻關係，係因為經歷劇場好友突然離世，蘇玉華指2019年做《親親麗南》嗰陣，有一位幫佢哋做票務嘅好朋友突然離開，蘇玉華與潘燦良好傷心趕到醫院，只能見到佢嘅另一半落完口供，抱住蘇玉華與潘燦良狂哭，蘇玉華表示：「我好記得佢好大力咁攬住我喺耳邊講：『我咩人都唔係！唔係佢咩人，唔能夠為佢做任何決定！』嗰刻我好震撼！呢個情景一直纏擾我，直接導致我同潘燦良考慮註冊結婚，因為人生到最後一刻，最親密嘅人都唔能夠為你決策，係好淒涼嘅一回事。」