獎門人曾志偉曾經講過，覺得徐麟可以帶到歡樂畀觀眾，所以搵佢加入《開心無敵獎門人》做新獎老，仲話將平日自己操刀嘅「開心無敵茶餐廳」，畀埋徐麟去講呀！
呢集6號晚終於播出，而徐麟亦都不負眾望為大家帶嚟唔少歡笑聲呀！先係獎門人以「女版金剛」介紹佢出場嘅時候，徐麟即以「金剛話」－半咸淡廣東話介紹自己：「我外表單純，但其實我灑(儍)得勻循， 希望帶到好多歡樂畀大家，可以炸爆一床(廠)。」令到全場大笑。去到「開心無敵茶餐 廳」時徐麟嘅笑彈更加係Level UP，一係就將啲餸名讀到似粗口咁，一係就完全唔知佢講緊餸名定街名，聽到一眾嘉賓成頭黑人問號，而觀眾就笑唔停。
呢集嘉賓有「優化獎老隊」江欣燕、何廣沛、孫慧雪、何雁詩、泰臣及王志安，對戰「優化港姐隊」嘅樊亦敏、朱凱婷、陳庭欣、何泳芍、陳若思、胡美貽同廖慧儀。「三太」樊亦敏喺玩「開心無敵啜乒乓」嗰陣無啦啦怕醜妹上身，獎門人見到咁即問佢有沒有男朋友，三太竟搞笑咁掩面嗌「唔得」，不過到正式埋牙啜乒乓波嗰陣，三太成功力保靚樣，十分厲害。
另外，呢集加插新遊戲「開心無敵估嘢食」，一班女參賽者齊齊完全放棄女神形象，好似孫慧雪忘我伸脷舔腐乳、納豆同蛋糕，何泳芍就食到成面朱古力，而陳庭欣更加係直接用口咬住成條紅腸，嚇到獎門人都話佢哋好鬼狼呀！
《開心無敵獎門人》逢星期日 20:30 翡翠台
