繼去年聖誕20週年演唱會同歌迷一齊度過之後， 張敬軒 今年將會再次同大家一齊過堅誕同迎接迎一年來臨，軒公12月20到1月2號會再舉行一連10場演唱會，今次軒仔準備為二十週年再做一個大總結，門票16號起信用咭優先訂購，22號公開發售。
今次演出題為《Revisit張敬軒演唱會》，所以就連海報都喺飛機艙拍攝，唔少港人至少三年未上過機外遊，難怪今次拍攝無論軒仔同工作人員都非常開心，軒仔仲笑言直頭有「陌生感覺」呀。
今次個唱由紅館轉移往灣仔會議展覽中心舉行，早前為鐵路新線拍廣告嘅佢笑言，「今次飛去灣仔，交通好方便，因為有東鐵線，哈哈。我哋之前做完26場二十週年演唱會，歌迷話仲有好多歌未唱，仲想聽，所以見時間ok ，好多方面都配合到，所以就決定不如一齊為呢個二十週年畫上一個完美句號。 演唱會用《Revisit》，中文解舊地重遊。所以呢個演唱會，會帶領大家，用歌同大家一齊重遊20年嘅回憶。」
今次表演會以三面台形式舉行，軒仔就話非常有新鮮感喇：「今次我哋落重本。首先係音響方面，保証每一位觀眾會有聽覺最高享受，另外視覺上都會好靚，聖誕新年係開心日子，所以成個騷唔會好似上次咁heavy，會歡樂好多。另外都一定唔會淨係唱Side Track，雖然好多歌迷話好多Side Track想聽，不過今次係重遊20週年嘅歌，所以經典、好聽嘅都會唱。」
今次海報喺機艙拍攝，軒仔亦非常非常期待可以再飛，所以一為個唱演出完，佢就會馬上飛去旅行。雖然已經三年冇得飛，不過就認為唔係可惜，因為大家都花多好多時間遊歷香港唔同地方，「呢三年大家睇多咗香港本身好多靚風景。而且疫情都教識左我哋好多野，人同人之間相處回憶變得好珍貴。」
