黃金盛宴丨81歲蔡瀾驚喜現身談「飲食節目」之道曾志偉連環放笑彈

馬浚偉主理TVB台慶大型廚藝節目《黃金盛宴》噚晚播出最後一集，9大星廚再度「合體」炮製過去8集入選「黃金盛宴」佳餚，以款待歷年一眾飲食節目VVIP，包括TVB總經理（節目內容營運）曾志偉、著名食評家蔡瀾、1985年港姐冠軍謝寧、資深廚師周中、薛家燕、周汶錡及莫樹錦醫生。
謝寧、莫樹錦醫生、周汶錡、曾志偉、蔡瀾、主理人馬浚偉、薛家燕、周中享用「黃金盛宴」佳餚。
81歲著名食評家蔡瀾先生擁有點石成金嘅魔力，喺飲食界影響力無人能及，曾主持唔少TVB旅遊及飲食節目《蔡瀾嘆世界》系列及《蔡瀾逛菜欄》等，2012年更為中央電視台製作嘅電視紀錄片《舌尖上的中國》擔任總顧問，足見其於美食界地位超然，今次獲邀到TVB成為《黃金盛宴》席上VVIP可謂別具意義。
呢餐黃金盛宴蔡瀾食得好開心。蔡瀾仲分享拍攝飲食節目心得。 Amanda刨松露畀蔡瀾食。
蔡瀾喺《黃金盛宴》大談做飲食節目心得：「始終唔好忘記我哋係一個電視節目，要令大家歡喜、鍾意睇，否則得你覺得好好，人哋覺得太過嚴肅、或睇落唔係幾好，就一定弊傢伙。」蔡瀾笑稱拍攝時唔可以食太飽，否則太飽滯會被眼神出賣，可見做飲食節目主持殊不簡單。
志偉大讚鼎爺個飯炒得好好味。
至於縱橫廚界逾半世紀嘅星級名廚周中，喺節目中對9大星廚炮製嘅黃金盛宴讚不絕口：「呢餐好多菜式係我做咁耐（節目）都冇食過，味道唔錯……」名廚周中於2006年於TVB綜藝節目《美女廚房》憑「啜核金句」彈出，並為TVB不少飲食節目擔任主持、嘉賓及評判，曾參與劇集演出，周中係第一代五星級酒店中菜部總廚，曾獲邀到日本、澳門及內地等唔同餐廳擔任烹飪顧問，曾應香港旅遊發展局邀請推廣香港美食，絕對係中菜界代表人物。
Amanda餵周中食松露。
曾志偉出名轉數快喺節目不停大放笑彈，曾志偉帶咗每公斤價值五位數美金、白化鱘魚所產嘅「黃金魚子醬」與大家開心Share，Jacques見狀即說：「呢個喺香港百分百係限量，我一生人都好少見，係皇帝級嘅食物！」盛裝出席嘅家燕姐大表驚嘆：「好啱我呢個『登基燕』食，哈哈!」家燕姐大讚黃金盛宴菜式擺設精緻，甚有「登基宴」Feel，曾志偉搞笑講：「你最難得係次次粒癦都黐得好準。」眾人笑爆全場，對於馬浚偉感激志偉邀請讓其擔任《黃金盛宴》主持，志偉繼續搞笑回應：「我依家好憎你，早知我做你嗰份。」

Jacques笑言有將蔡瀾撰寫關於自己的專欄文章裱起。志偉忽然問Set到個頭靚一靚嘅家燕姐返到屋企會唔會洗頭，全場爆笑。自封「登基燕」的家燕姐笑稱好啱佢食。志偉帶來名貴的「黃金魚子醬」與大家分甘同味。

馬浚偉同樣擅長搞氣氛，爆料指肥媽與鼎爺首次強強聯手時，一度以為性格火爆嘅二人會嗌交，豈料二人卻互助互愛儼如拍拖，噚晚鼎爺同肥媽合力炮製「松露蟹肉黃金酥」時，鼎爺數度匿稱肥媽做「阿妹」，馬浚偉見狀即解釋：「依家我哋要叫鼎爺契舅父，因為肥媽係阿媽嘛。」之後鼎爺即場炮製「黃金炒飯」，志偉食到舔舔脷兼笑言︰「依家先知鼎爺真名唔係李家鼎，係『冇得頂』。」

鼎爺和肥媽相處很有愛。 Amanda整嘅蛋糕連自稱唔食甜品嘅謝寧都讚好食。

鼎爺即場炮製「黃金炒飯」顯功架。