TVB節目巡禮2023丨過百藝員盛裝打扮出席 馬明認與靚湯計劃明年旅行結婚

一年一度為大家介紹TVB未來節目新陣勢嘅「無綫節目巡禮2023」，今日舉行，超過160位藝員小生花旦悉心打扮現身，向客戶及傳媒展示來年精彩綜藝節目同劇集，巡禮前夕，一眾高層與台前幕後一齊舉行拜神儀式及切燒豬，場面熱鬧！

藝人李偉健為公司設計手繪漫畫牆，佢感謝美術部同事及高手幫手，畀大家打卡影相，TVB明年推出節目包羅萬象，包括多部劇集《一舞傾城》、《狀王之王》、《香港人在北京》、《你好，我的大夫》、《痞子殿下2》、《隱形戰隊》、《寵愛Pet Pet》、《羅密歐與祝英台》。

馬國明呢日現身宣傳《隱形戰隊》，佢剛跟女友湯洛雯甜蜜遊日本，透露有意與女友湯洛雯旅行結婚，好大機會喺歐洲作為目的地，馬國明直認有結婚計劃：「好多嘢未公佈得，希望出年，總之開心嘢，如果真係旅行結婚，佢好似想喺歐洲，可能係佢以前讀書嘅英國，有可能係我以前讀書嘅地方加拿大，有可能係歐洲其他地方，我哋係傾過想旅行結婚多啲。」

姚子羚拍完兩套劇《一舞傾城》及《狀王之王》，剛由內地工作回港，姚子羚坦言跟張達明學習演技感到好幸福，張達明專登開咗一班指導後輩做戲，令姚子羚免費偷師，好姊妹黃智雯、胡定欣及趙希洛都話好掛住佢，而張達明大讚姚子羚演技好。

綜藝節目方面，鼎爺李家鼎同肥媽Maria Cordero聯合主持新節目《肥媽李鼎》、如火如荼正在拍攝中嘅《中年好聲音》、黃智賢主持破解香港重案節目《重案實錄》、三位閨密黃翠如、陳自瑤及連詩雅主持旅遊節目《CP旅行團》、譚俊彥宣傳新綜藝《還原歷史名菜》、愛咖啡之人陳豪及袁偉豪主持《豪遊咖啡》等。

陳豪及袁偉豪喺節目《豪遊咖啡》邀請咗朋友亮相，講吓香港呢兩年點解開咁多咖啡店、打卡文化、以及製作咖啡嘅過程；剛續約嘅高海寧將出發去泰國，與胡慧沖拍旅遊節目《吃貨橫掃曼谷》，佢期待去當地食嘢同掃貨。

此外，大熱劇集《下流上車族》迎來大結局，一眾演員相當受客戶歡迎，佢哋眾人有啲唔捨得，江美儀笑指大結局冇安排BBQ。