胡楓演唱會︱ 歌神張學友上台唱《愛是永恆》當眾向契爺下跪 修哥感動落淚

胡楓（修哥）今午（12日）假紅館舉行《修哥90迎金秋無限楓騷演唱會》，修哥先後唱出契仔契女嘅經典歌，當唱到張學友名曲《愛是永恆》，契仔張學友從升降台出現，與契爺修哥一齊唱，旋即全場歡呼，修哥見到契仔學友親身到場支持，即感動到眼濕濕，忍不住抹一抹眼淚，跟住張家輝亦出場，三人齊齊唱《情已逝》。

學友行上台前向契爺修哥跪低，學友感性地說：「如果我有一日90歲喺度唱，我就心滿意足，係畀一個希望我哋後輩，我一生人唔會點向人跪，除咗跪老婆之外。」可見修哥喺學友心目中地位十分重要，
修哥於2018年舉行《胡楓86破晒紀錄演唱會》，當時學友隔空送驚喜，身處新加坡開演唱會嘅張學友，跟修哥及張家輝進行視像交流，更獻唱《還是覺得你最好》，修哥呢日喺台上表示自從嗰次搵學友做嘉賓，之後佢都唔好意思再開口搵學友，因為那年自己個騷同學友新加坡個唱撞期，學友喺新加坡用通訊衛星「驚喜」幫佢做嘉賓，修哥稱要學友使好多錢，感到唔好意思，今年開騷係學友主動問修哥，自薦做嘉賓，所以修哥先叫佢幫手，好感動契仔前來支持。

而學友好戥契爺開心：「90歲喺紅館開騷，明年91歲你都記得一定要再開。」修哥稱今次已經有21個單位合作，學友笑說：「下次有30幾個，預埋我，我都會夾埋一份。」修哥個唱於下午6點幾完騷，修哥率領四個曾孫及一眾圈中好友上台大合唱《朋友》，見不少《愛‧回家》演員亦有現身支持修哥。