晚晚陪住大家嘅《愛•回家之開心速遞》呢日竟然有不速之客入侵，代表TVB嘅TVBuddy呢日就現身同劇中各位成員齊齊錄影台慶序幕歌舞，不過佢就非常得到大家歡心，仲不時整古做怪氹得大家好高興呀。

雖然丹爺唔覺意跳錯舞步，不過有大妹 滕麗名 二妹 呂慧儀 同細妹 蘇韻姿 傍住就冇有怕喇。不過TVBuddy呢日同大家齊齊開工，就非常百厭，仲恃住自己係吉祥物周圍搞事，唔怪得熊家上下就話要反擊喇。

而龍家上下呢日都有齊集齊出現，大龍生 #羅樂林 仲被爆當年嘅舞蹈員背景，呢日就走唔甩仲成為舞蹈擔當喇。

不時都會爆出唔少驚喜嘅處境劇《愛．回家之開心速遞》，一向都非常受觀眾歡迎，而近日佢哋為大家送上最新嘅兔年禮物，就係邀請咗 Gigi炎明熹 客串，早前我哋就獨家直擊咗拍攝嘅過程喇。

Gigi呢次演出雖然只係做返自己，不過佢都一樣做足功課，本身已經係《愛．回家》迷嘅佢，仲話要同晚晚「見面」嘅各位演員合作，諗起已經非常緊張，老友手汗仲出哂嚟同大家Say Hi咁話喎。

話晒都係劇迷之一，Gigi就話自己最深印象就係早前播出，熊若水成為唧暗瘡達人嘅一集喇，仲幻想自己可以客串呢一集演出呀。Gigi兔年一開就有非常好成績，好似歲晚就先後受邀演出央視同廣東衛視兩個大型春晚喇，Gigi仲話非常榮幸有份參與演出，仲獲成龍大哥現場指點呀。

除咗大型演出之外，Gigi又喺幾個內地大型頒獎禮接連得獎，佢就話每一個獎項對自己都非常重要，亦係自己最大嘅推動力，仲要非常感謝一直協助自己嘅幕後工作人員咁話呀。過年期間Gigi亦趁放假返家鄉同屋企人共聚，Gigi仲準備咗大利是送俾家人，表達自己嘅孝心呀。